दिल्ली, 03 अगस्त 2020। दुनिया म अइसे-अइसे सनकी लोग भरे हे कि उंखर कारनामा ल पूरा दुनियाभर म मजा ले के पढ़े जाथे। अइसे ही एक सज्जन के कारनामा आजकल चर्चा म हे। दरअसल दक्षिण कोरिया म एक मनखे ल अब्बड़ मात्रा म नगदी मिले रिहिस, जोन ह भारत के करेंसी के हिसाब ले करीब 14 लाख रुपिया रिहिस। दुनिया के कई देश मन के तरह कोरिया म घलो कोरोना के प्रकोप अब्बड़ फैइले हे। ये नोट मन ले संक्रमण झन फैइले एखर बर ये मनखे के दिमाग म अइसे क्रिएटिव आइडिया आइस कि वो लाखों रूपिया के सत्यानाश कर दिस। ये मनखे ह पहली सबो नोट ल वॉशिंग मशीन म डालिस अउ ओला धो दिस। वो सोचिस कि अइसे करे म अगर नोट म कोरोना वायरस होही त वो खतम हो जाही लेकिन पूरा मामला उल्टा पढ़गे। सबो नोट गीला हो चुके रिहिस। अब ये मनखे के दिमाग म दूसरा आइडिया आइस। वो नोट ल सुखाये के प्लान बनाइस, वो भी माइक्रोवेव ओवन म। रहे सहे कसर ओवन ह पूरा कर दिस, जोन नोट धोवाय म बचे रिहिस वो ओवन म जलगे। जब तक ये मनखे नोट ल निकालतिस तब तक लाखों के नोट ल ये सज्जन जला चुके रिहिस। वइसे बैंक ह एखर कुछ सही सलामत बचे नोट मन के बदला नवा नोट दे दिस लेकिन ये मनखे ल लाखों रूपिया के नुकसान हो चुके रिहिस।
साभार-लल्लू राम.कॉम
