रायपुर, 25 सितंबर 2020। करोना के चलते लइका मन के शिक्षा बर राज्य शासन अऊ शिक्षक मन कोति ले बहुतेच उदीम करे जात हे। छत्तीसगढ़ के राजनांदगांव जिला के नक्सल प्रभावित आदिवासी क्षेत्र मोहला विकास खण्ड के आखरी छोर म स्थित पाटनखास संकुल के 13 स्कूल मन म संसदीय सचिव श्री इंद्रशाह मंडावी ह डिजिटल क्लास के उद्घाटन करिन। उमन कहिन के शिक्षा के प्रति मोहला विकासखण्ड के प्रगति दूसर मन बर अनुकरणीय हे। अब इहां के लइका स्मार्ट टीवी (स्मार्ट क्लास) डिजिटल स्कूल के माध्यम ले पढ़ाई करहीं। इहां स्कूल मन के शिक्षक मन ह स्मार्ट टीवी उपलब्ध करा के लइका मन ल डिजिटल शिक्षा प्रदान करे के बीड़ा उठाए हें। डिजिटल स्कूल म टीवी म मोबाइल के माध्यम ले पढ़ाई होही। ये क्लास म कोनो प्रकार के कोनो सिंग्नल के जरूरत नइ परय, मोबाइल ले कनेक्ट करके लइका मन ल खेल-खेल म घलोक शिक्षक पढ़ई करवाहीं।
मोहला विकासखण्ड म स्कूल शिक्षा विभाग कोति ले 280 स्कूल संचालित हे। अभी इहां के 137 प्राथमिक अऊ माध्यमिक स्कूल मन म टीवी के माध्यम ले पढ़ाई के शुरुआत हो गे हे। पाटनखास के शासकीय स्कूल मन म लइका मन ल डिजिटल पढ़ाई बर स्थानीय सरपंच, जन प्रतिनिधि, ग्रामीण अऊ शिक्षक मन के आर्थिक सहयोग ले स्मार्ट टीवी उपलब्ध कराए गए हे। पाटनखास के सरपंच श्रीमती इंदिया कोमरे अऊ पाटनवाड़वी सरपंच श्रीमती जंत्री बाई पोरेटी ह 6 स्कूल मन बर 18-18 हजार रुपिया, मोहला सरपंच सरस्वती ठाकुर ह 6 हजार रूपिया के आर्थिक सहयोग प्रदान करे हे। बांचे के सहयोग शिक्षक मन ह करे हें।
संसदीय सचिव श्री इंद्रशाह मंडावी ह ये बेरा म शिक्षक मन के प्रयास के सराहना करत उमन ल बधाई दीन। स्मार्ट क्लास के रूप म शिक्षा के स्तर लगातार सुधारे जात हे। श्री शाह ह कहिन के ये आदिवासी क्षेत्र के लइका जिला, प्रदेश अऊ दूसर प्रदेश म पढ़े बर जात हें, जऊन ये नक्सल प्रभावित क्षेत्र बर सुखद खबर हे।
इही कड़ी म दन्तेवाडा जिला के विकासखण्ड तोकापाल म मोहल्ला क्लास के आयोजन करे जात हे। इहां मोहल्ला म कुछ लइका मन निरधारित जगा म सोशल डिस्टेंसिंग के पालन करत भिनसरहा अऊ संझा के समय पढ़े बर बइठथें। ए लइका मन ल सीख कार्यक्रम के अंतर्गत शैक्षिक विडिओ अऊ विसय के खांटी जानकार मन के बनाय वीडियो के माध्यम ले शिक्षा देहे जात हे, जेखर लाभ पढ़ईया लईका मन ल मिलत हे। शैक्षणिक गुणवत्ता बर तारागांव संकुल म पारा-मोहल्ला म स्मार्ट टीवी लगवाए गए हे। एखर से लइका मन ऑफलाइन शिक्षा प्राप्त करत हें। इहां करीबन 12 स्मार्ट टीवी लगाए गए हे। सीख कार्यक्रम ले मिले वीडियो ल घलोक स्मार्ट टीवी के माध्यम ले देखाय जात हे। लइका मन ये व्यवस्था ले प्रसन्नता पूर्वक अध्ययन करत हें। अध्ययन प्रक्रिया म विशेष ध्यान रखे जात हे के बहुत भीड़ झन होवय। कार्यक्रम ल सफल बनाए म जनसमुदाय अऊ ग्राम म उपस्थित शिक्षित युवक-युवति अऊ रिटायर्ड मनखे, सेवादार मन के बड़का भूमिका हे। सेवादार अपन सुविधा के मुताबिक कक्षा लेवत हें।
