उपार्जित धान खराब होए म लापरवाही बर कलेक्टर ह तीन ठन समिति के अधिकारी मन ल भेजिस नोटिस

कोण्डागांव, 07 जून 2021 सम्मार। जिला म बिन बेरा होय बरसा ले धान खरीदी केन्द्र मन म उपार्जित धान ल व्यवस्थित अउ सुरक्षित रख-रखाव ल सुनिश्चित कराए बर कलेक्टर पुष्पेन्द्र कुमार मीणा कोति ले जिला के सबो समिति मन ल ये संबंध म निर्देश पहिलीच ले जारी करे रिहिसे । कलेक्टर के निर्देशानुसार जिला खाद्य अधिकारी भूपेन्द्र मिश्रा कोति ले खाद्य विभाग के दल संग जिला के उपार्जन केंद्र मन के निरीक्षण करत हावय । जेकर अनुसार शनिच्चर के वोमन दल सहित उपार्जन केन्द्र उरदाबेड़ा, अमरावती अउ चिपावंड पहुंचिन। जिहां उन् मन खरीफ विपणन बछर 2020-21 म धान उपार्जन बर देहे गे दिशा-निर्देश अउ जिला कार्यालय कोति ले बेरा-बेरा म जारी करे गे निर्देश मन के पालन नइ करत पाइन। जेकर सेति उपार्जित धान ल बेरा—कुबेरा होए बरसा ले भींजे अउ खराब होए पाए ग्ईन। जेला देखत कलेक्टर कोति ले लापरवाही पूर्वक बूता करे अउ इही सेति शासकीय धान के होय क्षति बर उरंदाबेड़ा, अमरावती अउ चिपावंड के समिति प्रबंधक अउ खरीदी प्रभारी मन ल नोटिस जारी करके स्पष्टीकरण मांगे गे हवय। ये जांच दल म जिला खाद्य अधिकारी नेतृत्व म सहायक खाद्य अधिकारी राबिया खान ,खाद्य निरीक्षक नवीनचंद श्रीवास्तव, हितेशदास मानिकपुरी, गुलशन नंद ठाकुर अउ मनीराम बघेल तको संघरे रिहिन ।