हर वार्ड म लगही शिविर, समस्या मन के यथासंभव मौका म ही निराकरण करे जाही
उप मुख्यमंत्री श्री अरुण साव ह नगरीय निकाय मन के सबो विभाग मन के अधिकारी मन ल शिविर म मौजूद रहके मनखे मन के दिक्कत दूर करे के दीन निर्देश
नगरीय निकाय के पदाधिकारी अऊ जनप्रतिनिधि मन ले जनसमस्या निवारण पखवाड़ा म सक्रिय भागीदारी के अपील
रायपुर, मुख्यमंत्री श्री विष्णु देव साय के हुकुम म प्रदेश के सबो नगरीय निकाय मन म 27 जुलाई ले 10 अगस्त तक जनसमस्या निवारण पखवाड़ा के आयोजन करे जाही। ए बेरा म नगर निगम मन, नगर पालिका मन अऊ नगर पंचायत मन म वार्डवार शिविर मन के आयोजन कर समस्या मन के निदान करे जाही। उप मुख्यमंत्री अउ नगरीय प्रशासन अउ विकास मंत्री श्री अरुण साव ह जनसमस्या निवारण पखवाड़ा म नागरिक मन के समस्या मन ल हल करे विभागीय अधिकारी मन, नगर निगम मन के आयुक्त, नगर पालिका मन अऊ नगर पंचायत मन के मुख्य नगर पालिका अधिकारी मन ल समुचित इंतजाम के निर्देश देहे हे। उमन वार्ड मन म आयोजित शिविर मन म महापौर, अध्यक्ष, पार्षद अऊ आन जन प्रतिनिधि मन ल उपस्थित रहे के अपील करे हे, ताकि एमां आमजन के जादा ले जादा सहभागिता हो सकय।
उप मुख्यमंत्री श्री अरुण साव ह राज्य के सबो 184 नगरीय निकाय मन म मनखे मन के समस्या मन के निराकरण बर वार्डवार शिविर आयोजित करके उंखर मौका म ही निराकरण के निर्देश नगरीय प्रशासन अउ विकास विभाग ल देहे हें। उमन कहिन कि वार्डवार शिविर मन के आयोजन ले स्थानीय प्रशासन म लंबित शिकायत मन के जल्दी निदान होही अऊ नागरिक मन ल जरूरी सुविधा मिलही। समस्या मन के निराकरण मौका म ही जल्दी होए ले शहरी सरकार के प्रति मनखे मन म सद्भाव घलोक बाढ़ही।
राज्य शासन कोति ले जनसमस्या निवारण पखवाड़ा के आयोजन बर नगरीय निकाय मन ल जारी परिपत्र म नगरीय प्रशासन अउ विकास विभाग के सचिव डॉ. बसवराजु एस. ह निर्देशित करे हे कि स्थानीय रहवासी मन ल नागरिक सुविधा उपलब्ध कराना निकाय के मुख्य दायित्व हे। नल कलेक्शन, राशन कार्ड, राष्ट्रीय कुटुंब सहायता, वृद्धावस्था पेंशन, सामाजिक सुरक्षा पेंशन, जन्म-मृत्यु प्रमाण पत्र, भवन निर्माण अनुज्ञप्तियां, अनापत्ति प्रमाण पत्र, नामांतरण, स्वरोजगार के प्रकरण अउ कई प्रकार के छोटे-छोटे काम होथे, जेकर निराकरण जल्दी होना चाही। एकरे संग जलापूर्ति म लीकेज, नल म पानी नइ आना, नाली अउ गली मन के सफाई, सार्वजनिक नल के प्लेटफार्म ले पानी बहना, कचरा के सफाई अउ परिवहन, टूटे-फूटे नाली मन के मरम्मत, सड़क मन के गड्ढा पाटना, स्ट्रीट लाइट्स के बंद रहना जइसे समस्या घलोक होथे। वार्डवार जनसमस्या निवारण शिविर मन के उद्देश्य ए समस्या मन के निराकरण के संग ही नागरिक मन ल जरूरी जन सुविधा उपलब्ध कराना घलोक हे।
नगरीय प्रशासन विभाग ह नगरीय निकाय मन के सबो विभाग मन के अधिकारी मन ल शिविर म मौजूद रहिके समस्या मन के निराकरण यथासंभव मौका म ही करना सुनिश्चित करे के निर्देश देहे हें। शिविर मन म करदाता मन ल कर के भुगतान के सुविधा घलोक उपलब्ध कराए जाही। विभाग ह वार्डवार शिविर मन के आयोजन के संबंध म वार्ड अउ नगर म व्यापक प्रचार-प्रसार के व्यवस्था करे के घलोक निर्देश देहे हे, ताकि आम नागरिक शिविर के पूरा लाभ उठा सकय।
