शहरी पशु पालक मन ल अपन मवेसी मन ल खुल्ला झन छोड़े के खवाए जाही किरिया
कोण्डागांव, 19 जून 2020। गांव मन के संगे संग शहर म रहइया पशु पालक मन ल अपन पालतू मवेसी मन ल खुला भटके ले रोके बर नगर पालिका कोण्डागांव ह परंपरागत रोका-छेका अभियान 19 ले 30 जून तक चलाही। राज्य म खरीफ फसल, साग-सब्जी के बाड़ी मन ल मवेसी मन ले बचाए बर रोका छेका एक प्रथा रहे हे अऊ शासन फसल उत्पादकता ल बढ़ावा देहे के उद्देस्य ले दलहनी तिलहनी फसल मन के खेती, साग सब्जी अउ फलो उत्पादन ल प्रोत्साहित करे बर प्रतिबद्ध हे। जेखर सेती ये मुहिम म शहरी क्षेत्र के पशु पालक घलोक हिस्सा लेके अपन पशु मन ल खुले म झन छोड़े के किरिया खाहीं।
कार्यालय नगर पालिका ले जानबा होए ह के अभियान के प्रभावी अमल बर नगर पालिका के जम्मो क्षेत्र के 22 वार्ड मन के मवेसी मन के जानकारी प्राप्त करे बर वार्ड वार सर्वेक्षण बर वार्ड प्रभारी के नियुक्ति करे गीस अऊ सर्वेक्षण कर देहे गए हे। एकर से अब तक कुल सर्वेक्षित 200 परिवार मन ले करीबन 800 मवेसी मन के संख्यात्मक जानकारी सकेले गए हे अउ पशु पालक मन ले हस्ताक्षरयुक्त संकल्प पत्र लेहे जात हे जऊन ल नगरीय निकाय कार्यालय अउ वार्ड कार्यालय के रिकार्ड मे रखे जाही। निकाय के क्षेत्र अतंर्गत महात्मा गांधी वार्ड अउ अम्बेडकर वार्ड म दू कांजी हाउस अउ मर्दापाल रोड एस आर एल एम सेन्टर तीर चुने गए गोठान म पशु मन ल रखे बर समुचित व्यवस्था करे गए हे। पशु मन बर 24 घण्टा दाना पानी, पैरा घास के व्यवस्था छायादार वृक्ष अउ वर्षा ले बचे बर व्यवस्था करके शेड बनवाए जात हे। पशुपालन ले उत्सर्जित होवइया अपषिष्ट गोबर आदि बर घुरूआ के घलोक व्यवस्था करे जाही। निकाय ह ये घलोक प्रयास करत हे के निकाय के गोठान म पशु पालक मनले एक निरधारित शुल्क जमा करके देखभाल करइया चरवाहा मन के संग शहरी गोठान म पशु मन ल चराए अउ देख रेख के व्यवस्था होही। अभियान के तहत् ये घलोक हुकुम हे के 19 जून 30 जून तक रोका छेका संक्ल्प अभियान के तहत् कहूं पालतू पशु शहर के सड़क मन म आवारा घूमत पाए जाही त डा़ड अऊ जुर्माना के रूप मे निरधारित रासि मालिक पशु पालक मन ले वसूल करे जाही। एखर बर नगर पालिका ह व्यापक प्रचार प्रसार मुनादी घलोक करवावत हे।
