उत्तर बस्तर कांकेर: लाभकारी फसल मन के खेती ले समृद्ध होइन ग्राम पुसवाड़ा के किसान

उत्तर बस्तर कांकेर, विकासखण्ड कांकेर अंतर्गत ग्राम पुसवाड़ा म किसान मन धान के खेती के अलावा लाभकारी फसल मन के खेती घलोक करत हें। उमन सुगंधित धान के खेती के संग खेत के मेड़ मन म राहेर के फसल लेवत हें अऊ बड़का पैमाना म किसान मन साग-सब्जी के खेती करत हें, जेखर से ओ मन ल बनेच आमदनी होवत हे अऊ ओ मन आर्थिक रूप ले समृद्ध होवत हें।
कलेक्टर डॉ. प्रियंका शुक्ला ह पुसवाड़ा गांव पहुंचके किसान के सब्जी के खेती के अवलोकन करिन। किसान छबिलाल नाग ह दू एकड़ जमीन म टपक पद्धति ले सब्जी के खेती करत हे, अभी हाल म पत्ता गोभी के फसल लगाए हे। वो ह बताइस कि वोखर पास 03 एकड़ जमीन हे, जेमां ले दू एकड़ म सब्जी के खेती करत हे, एखर अलावा आधा एकड़ जमीन लीज म लेके सब्जी के खेती करत हे। पाछू साल बरबट्टी, लौकी, टमाटर, भिंडी, तरबूज, मिर्च आदि के फसल लेहे रहिस, जेला बेंचें ले ओ ल करीबन 07 लाख रूपिया के आमदनी होए रहिस। वो ह बताइस कि वोला उद्यानिकी अऊ कृषि विभाग कोति ले संचालित योजना मन ले लाभान्वित करे गीस अऊ समय-समय म सलाह घलोक देहे जात हे। किसान आत्माराम नाग अऊ भुनेष्वर नाग ह जानकारी देवत बताइस कि छै एकड़ जमीन म ले एक एकड़ म सब्जी उपजाए हें अऊ लीज म घलोक जमीन लेहे हे, जेखर से ओ मन ल अच्छा आमदनी हो जात हे। कलेक्टर डॉ. प्रियंका शुक्ला ह ग्राम पुसवाड़ा के किसान मन के लाभकारी फसल-साग-सब्जी, दलहन, तिलहन के खेती ल सहरावत जिला के आन किसान मन ल प्रोत्साहित करे ल कहिन।