उत्तर बस्तर कांकेर, चारामा विकासखण्ड के ग्राम किशनपुरी निवासी शीतल कुमार साहू अपन पढ़ाई पूरा करे के बाद रोजगार के तलाश करत रहिस। रोजगार के तलाश म जब वोला कोनो रद्दा नजर नइ आइस, त वोला अपन भाई अऊ गांव के मनखे मन ले मुख्यमंत्री कौशल विकास योजना के जानकारी मिलीस। वो ह लाइवलीहुड कॉलेज कांकेर म असिस्टेंट इलेक्ट्रिशियन कोर्स बर आवेदन करिस। आवेदन करे के एक हफ्ता के भीतर ही शीतल ल कौशल विकास विभाग ले फोन आइस अऊ ओला निःशुल्क प्रशिक्षण के जानकारी उपलब्ध कराए गीस।
शीतल ह बताइस कि मैं 12वीं पास हंव, मोर घर म केवल मोर पिता मोहन साहू ही कमाऊ सदस्य हे, जेन किसान हे अऊ वोखर आमदनी म मॉ, एक भाई अऊ एक बहिनी अऊ खुद आश्रित हे। लाईवलीहुड कॉलेज कांकेर ले प्रवेश बर फोन आइस त वो ह अपन सामान धर के घरवाले अऊ गांव वाले मन ले विदा लेत कांकेऱ के आजीविका महाविद्यालय म अपन दाखिला कराए पहुंचिस, जिहॉ ओला नवा-नवा संगी मिलिन अऊ अपन रूचि के अनुसार बेहतर विशेषज्ञ घलोक मिलिस। ओ ह कॉलेज म रोज नवा-नवा तकनीक के प्रशिक्षण पाईस। कॉलेज म ओला निःशुल्क भोजन अऊ रहे के व्यवस्था मिलीस जेखर से ओ ह अपन काम म रूचि लेके प्रशिक्षण प्राप्त करिस।
वोकर बताती कॉलेज आके मोर आत्मविश्वास म इजाफा होइस अऊ प्रशिक्षण के समय मोला आधुनिक तकनीक ल चलाय के हुनर घलोक सीखे ल मिलीस। काम सीखे के संगेच मोला अपन प्रतिभा ल निखारे के अवसर मिलीस, जेखर से मैं अब शहरी जीवन शैली अऊ बातचीत के नवा तौर तरीका के बारे म सीखेंव, संगेच रहन-सहन अउ बोलचाल के शैली म घलोक सुधार आइस। प्रशिक्षण के बाद मोला प्रमाण पत्र मिलीस अऊ आजीविका कॉलेज के प्रयास ले मोला अरिहंत इलेक्ट्रॉनिक्स कांकेर म 06 हजार रूपिया के रोजगार मिलीस। अपन कमाए पइसा के कुछ हिस्सा अपन परिवार बर खरच करथंव अऊ अपन पिता के जिम्मेदारी म हाथ बटाथंव। ये प्रशिक्षण ले मोर जीवन म एक नवा बदलाव आइस, जेखर से मैं अड़बड़ खुश हौं अउ आत्मनिर्भर बन गए हौं।
उत्तर बस्तर कांकेर के लाईवलीहुड कॉलेज म प्रशिक्षण ले शीतल ल मिलीस रोजगार
