उत्तर बस्तर कांकेर, प्रदेश के वाणिज्यकर आबकारी, वाणिज्य अऊ उद्योग मंत्री श्री कवासी लखमा आज कांकेर के जुन्ना कम्युनिटी हॉल म रसोईया संघ के सम्मेलन म सामिल होइन। श्री लखमा ह इसोईया संघ के मांग मन ल ध्यान म रखत जउहे च मुख्यमंत्री ले चर्चा करके कलेक्टर दर म भुगतान करे जाय के आश्वासन दीन।
श्री लखमा ह सम्मेलन ल संबोधित करत कहिन कि हमर सरकार जऊन वादा करथे ओला पूरा करके दिखाथे। जनघोषण पत्र म करे गे वादा ल एक-एक करके सबो घोषणा ल पूरा करे जाही। रसोईया मन के मानदेय ल 12 सौ रूपिया ले बढ़ाके 15 सौ रूपिया करे गए हे, येकर आदेश जारी हो गए हे। एकर लाभ उमन ल लउहे मिले लगही।
उमन बताइस कि सरकार ह तय करे हे कि सबो वर्गो के लोगन मन के राशन कार्ड बनही, सरकारी कर्मचारी होवय या मजदूर बीपीएल वाले ल एक रूपिया किलो म चांवल मिलही। एपीएल कार्ड धारी ल 10 रूपिया म चांवल वितरण करे जाही। सरकार ह तेंदूपत्ता के दर बढ़ाके 04 हजार रूपिया मानक बोरा कर देहे हे। ये सरकार किसान, मजदूर अऊ रसोईया संघ मन के सरकार ये। सबके समस्या मन के पारी-पारी ले निराकरण करे जाही।
सम्मेलन ल मुख्यमंत्री के सलाहकार श्री राजेश तिवारी, विधायक श्री शिशुपाल शोरी, सिहावा विधायक श्रीमती लक्ष्मी ध्रुव ह घलोक संबोधित करिन। ये बेरा म नगर पालिका अध्यक्ष श्री जितेन्द्र ठाकुर, जिला पंचायत सदस्य श्री बिरेश ठाकुर, पूर्व विधायक श्री शंकर ध्रुवा, जनपद सदस्य श्री राजेश भास्कर, रमाकांत दर्रो, सरपंच गढ़पिछवाडी श्री तरेन्द्र भण्डारी, रसोईया संघ के प्रांताध्यक्ष रामराज कश्यप, संरक्षक संग्राम मरकाम, सचिव मेघराज बघेल, कोषाध्यक्ष कन्हैयालाल संग अड़बड़ झन म रसोईया संघ के सदस्य उपस्थित रहिन।