श्रद्धा आत्मनिर्भर होके, दूसर मन ल घलोक देवत हे स्वरोजगार

उत्तर बस्तर कांकेर, 31 मार्च 2021। शहर के मांझापारा निवासी श्रीमती श्रद्धा मिश्रा स्नातक तक के पढ़ई करे हे अऊ अपन पति के दुकान म सहायता करके पति के संग दुकान संभालत रहिस, पति के दुकान ले होवत कमई ले वो ह संतुष्ट नइ रहिस अऊ खुद कुछ करना चाहत रहिस। श्रद्धा ह अपन परिवार के जिम्मेदारी खुदे उठाए बर शहर ले सटे ग्राम-मनकेशरी म कम्प्यूटर अऊ फोटोकापी सेंटर संचालित करे के ठानिस । श्रद्धा ह अपन परिवार बर खुद कुछ करे के सपना देखत रहिस अऊ पढ़ई के बाद रोजगार ले जुड़े के ओखर ये फैसला अटल रहिस।
स्वावलम्बी बने के इच्छा रखइया श्रद्धा ह अपन खुद के दुकान संचालित करे बर पंजाब नेशनल बैंक शाखा-कांकेर म करजा के जानकारी लेहे ल गीस त उहां ओला शाखा प्रबंधक ह जिला व्यापार अउ उद्योग केन्द्र म संचालित प्रधानमंत्री रोजगार सृजन कार्यक्रम योजना के जानकारी दीस। श्रद्धा ह उहां जाके योजना के जानकारी लीस अऊ प्रधानमंत्री रोजगार सृजन कार्यक्रम के चयन करके नियमानुसार पंजाब नेशनल बैंक शाखा-कांकेर ले करजा लेहे बर आवेदन दीस। बैंक ह वोला 5 लाख रूपिया के करजा दीस एकर से वो ह अपन खुद के कम्प्यूटर अउ फोटोकापी सेंटर खोल के संचालित करे लगिस।
अब श्रद्धा ह कम्प्यूटर अउ फोटोकापी मशीन लगाके तीर-तखार के मनखे मन ल सेवा दे के करीबन 20 हजार रूपिया हर महिना कमावत हे अउ अपन दुकान म 5 बेरोजगार मन ल रोजगार तको देके ऊंखर जीवन यापन म घलोक मददगार साबित होवत हे। श्रद्धा ह रोजगार मिले के बाद आय के कुछ हिस्सा ले परिवार के घलोक आर्थिक मदद करथे, जेखर से वोखर परिवार के आर्थिक स्थिति म सुधार होए हे। श्रद्धा के स्वावलम्बी बने के इच्छा ह ओला नवा रद्दा देखाइस अऊ आर्थिक रूप ले सशक्त होके जीवन म आगू बढ़े बर आत्मविश्वास घलोक जगाइस।