रायपुर, महिला अऊ बाल विकास अऊ समाज कल्याण मंत्री श्रीमती अनिला भेंड़ीया ह अपन उत्तराखंड राज्य के प्रवास के बेरा म आंगनवाड़ी केंद्र अऊ एसओएस बाल ग्राम के अवलोकन करिस अऊ राज्य म संचालित कई ठन योजना मन के जानकारी लीन। उमन नैनीताल जिला के भीमताल बाल विकास परियोजना के आंगनवाड़ी केंद्र म पूरक पोषण आहार कार्यक्रम संग कई ठन सेवा मन के अवलोकन करिन।
श्रीमती भेंड़िया ह आंगनवाड़ी केंद्र के अधिकारी-कर्मचारी मन ले लइका मन ल देहे जात स्कूल पूर्व शिक्षा के संबंध म बातचीत करिन। उमन केंद्र म उपस्थित माता मन ले घलोक केन्द्र म मिलत पूरक पोषण आहार, स्वास्थ्य सुविधा अऊ मिलत लाभ मन के संबंध म बातचीत करिन। श्रीमती भेंडिया भीमताल म संचालित एसओएस बाल ग्राम घलोक गइन अऊ परिवार केंद्र मधुबन के अवलोकन करिन। उमन कुटुंब केन्द्र मधुबन म नैसर्गिक वातावरण म निवासरत् कुटुंब ले चर्चा करिन अऊ उंखर कोति ले उहां देहे जात सुविधा मन के जानकारी लीन। उमन संस्था के कार्य मन के घलोक अवलोकन करिन। श्रीमती भेंडिया ह हितग्राही मन ल दिये जात भोजन, देखभाल अऊ सुविधा मन के बारीकी ले अध्ययन करिन।
श्रीमती भेंड़िया ह एसओएस बाल ग्राम के संस्था प्रमुख अऊ आन कर्मचारी मन ल अच्छा काम बर शुभकामना दीन अऊ स्मृति चिन्ह भेंट करिन। श्रीमती भेंड़ीया के संग छत्तीसगढ़ के महिला अऊ बाल विकास विभाग अऊ राज्य महिला आयोग के अधिकारी घलोक उपस्थित रहिन।
