वैक्सीनेशन बर गायता मन करत हें जागरूक : जिला के सुदुर अंचल मन म दस्तक देवत हे वैक्सीनेशन टीम

नारायणपुर, 9 जुलाई 2021। कलेक्टर श्री धर्मेश कुमार साहू ह कोविड-19 ले सुरक्षात्मक उपाय बर जिला म टीकाकरण ल अभियान के रूप म चलाय बर 5 जुलाई ले 12 जुलाई तक वैक्सीनेसन हफ्ता चलाये के हुकुम देहे हें। जिला ल कोरोना संक्रमण के प्रभाव ले बचाय बर जिला म 5 जुलाई ले अभियान के शुरुवात होइस। ये अभियान के अन्तर्गत वैक्सीनेसन टीम अब वैक्सीन लगाय बर जिला के सुदुर अंचल मन म घलोक अपन दस्तक देवत हे। जिला के दुर्गम क्षेत्र अऊ विषम भौगोलिक परिस्थिति के बावजूद स्वास्थ्य विभाग के टीम उबड़-खाबड़ रद्दा, नदी-नाला ल पारके ओरछा क्षेत्र के वनाचंल गांव जिहां आवागमन के साधन नइ होए के सेती कई किलोमीटर तक दुर्गम मार्ग म पैदल चलके गांव के घर मन म पहुंचके मनखे मन ल कोरोना वैक्सीन लगावत हें। वैक्सीनेसन अभियान के अन्तर्गत स्वास्थ्य विभाग जिला नारायणपुर कोति ले 5 जुलाई ले लेके अब तक चले ये सघन अभियान म जिला के मनखे मन म वैक्सीन लगावाए बर अच्छा उत्साह देखे जात हे।
कलेक्टर श्री धर्मेश कुमार साहू के हुकुम के मुताबिक मुख्य चिकित्सा अउ स्वास्थ्य अधिकारी डॉक्टर पुजारी के मार्गदर्सन म वैक्सीनेशन टीम कोहकामेटा सेक्टर के ग्राम बेचा अऊ मुरनार म कोविड वैक्सीनवेशन बर भिनसरहा 6 बजे रवाना होके सुबह-सुबह जादा ले जादा मनखे मन के वैक्सीनेशन करे के उद्देश्‍य ले बेचा गांव पहुंच कै वैक्सीनेशन करना शुरू करिस अऊ 20 मनखे मन के वैकसीनेसन आधा घंटा म ही कर दीन, जेमां गांव के गायता अऊ कुछ गांव वाले मन के सहयोग मिलीस। ओखर बाद टीम मुरनार कोति जाके 40 मनखे मन ल वैक्सीन लगाइस। जेमां जिला पंचायत नारायणपुर, गांव के सरपंच, सचिव, मितानीन, आंगनबाड़ी कार्यकर्ता, शिक्षक अऊ डॉ.रत्ना नशीने के विशेष सहयोग मिलीस। जिवलापदर गांव म घलोक वैक्सीनेशन टीम ह 43 मनखे मन ल वैक्सीन लगाईस। ये प्रकार ले वैक्सीनेसन टीम ह 8 जुलाई के कोहकामेटा सेक्टर के एक दिन मे सबले जादा 103 मनखे मन ल वैक्सीन लगाइस। अब तक जिला म 40 हजार 760 के वैक्सीनेशन करे गए हे। ये मां ले 30900 मनखे मन ह पहिली डोज अउ 9860 मनखे मन ह दूसर डोज लगाए हें।