बलौदाबाजार, 30 अप्रैल 2021। अभीन के समें म चारो कोति कोरोना ले मौत के खबर ले मनखे मन के मनोबल टूटत हे, उहें बलौदाबाजार जिला म मनखे मन म निराशा के जगा आशा के किरण बगरावत डॉक्टर मन के टीम ह कोरोना मरीज मन ल होम आईसोलेशन मे रखके स्वस्थ करत हें। अइसनहेच निराशा के बीच रवान गांव के वैष्णव दंपति ह कोरोना वायरस ल मात देहे हें। ग्राम रवान के वैष्णव दंपति ल 15 दिन पहिली बुखार अऊ सर्दी के शिकायत होए रहिस। संगेच जेवन ह बेस्वाद हो गीस अऊ खुशबू घलोक गंधहीन लगे लगिस। उमन कोरोना टेस्ट करवाइन त पॉजिटिव आइन। उंकर घर म छोटे लइका घलोक रहिस देला देखत ओ मन कोविड हास्पिटल जाय के सोचे रहिन। फेर डाक्टर मन ह सलाह दीन के कहूं दवई के बराबर सेवन करहू अऊ कोविड नियम मन के पालन करहू त जल्दी स्वस्थ हो जाहू। ये बात उपर भरोसा करके उमन घरे म रहि के दवई चालू कर दीन।
वृहद आनलाईन छत्तीसगढ़ी-हिन्दी शब्दकोश की कड़ी-
https://dictionary.gurturgoth.com
सरलग समाचार म आवत मौत अऊ आक्सीजन के कमी के खबर ले उंकर मन बइठत जात रहिस फेर डाक्टर मन सरलग उमन ल ढाँढस बंधात रहिन। जेखर सुग्घर परिणाम मिलीस अऊ पंद्रा दिन तक डॉक्टर मन के सलाह अऊ दवई के सेवन करके ग्राम रवान वार्ड नं. 3 के निवासी मनहरण वैष्णव उमर 59 साल अऊ उंखर पत्नी पूर्णतया स्वस्थ हो गीन। ये संबंध म मनहरण वैष्णव ह बताइस के एक बारगी तो लगातार समाचार मन ल देख के लागिस के हमू अब नइ बांचबोन का, फेर डॉक्टर मन ह सरलग हमर से संपर्क करके हमर मनोबल ल बढा़इन अऊ उंखर सलाह मानके अब हमर परिवार पूरा स्वस्थ हो गे। उमन कहिन के मैं सबो मनसे ले इही अनुरोध करहूं के ये विकट स्थिति म अपन मनोबल ल झन टुटन दव। आत्मविश्वास ल बनाये रखव अऊ डॉक्टर मन के सलाह म दवई के सेवन करव सबो लउहे स्वस्थ होहू।
डॉक्टर के सलाह मान के होम आईसोलेशन म रहि के रवान के वैष्णव दंपति ह हराईस कोरोना ल
