रइपुर 6 जुलाई 2021 मंगल। छत्तीसगढ़ के विधानसभा अध्यक्ष डॉ. चरणदास महंत अउ लोकसभा सांसद श्रीमती ज्योत्सना महंत ह आज जांजगीर-चांपा जिला के नगर पंचायत सारागांव म अपन निवास परिसर म जिला स्तरीय वजन तिहार के उद्घाटन करीन। ये बेरा म 12 महीना के नान्हें सम्राट अउ 21 महीना के शौर्य के वजन अउ ऊंचाई नापे गइन। दूनो के वजन पोषण के सामान्य स्तर के श्रेणी म पाए गइस । विधानसभा अध्यक्ष अउ सांसद श्रीमती ज्योत्सना महंत ह दूनों लइका मन ल उन्कर उज्जर भविष्य के शुभकामना दीन। कलेक्टर श्री जितेन्द्र कुमार शुक्ला तको ये बेरा म संघरे रिहीन ।
महिला अउ बाल विकास विभाग के जिला कार्यक्रम अधिकारी श्रीमती प्रीति खोखर चखियार ह बताइन कि जिला म 7 जुलाई ले 16 जुलाई तक वजन तिहार के आयोजन करत हावय। तिहार म जम्मो आंगनबाड़ी केंद्र म 0 ले 5 बछर तक के लइका मन के वजन अउ ऊंचाई नापे जाही । लइका मन के कुपोषित अउ गंभीर कुपोषित पाए जाए म उन्कर समुचित उपचार अउ योजना के लाभ देके पोषण के सामान्य स्तर म लाए के उदीम करे जाहीं । किशोरी बालिका मन के हीमोग्लोबिन के जांच करके एनीमिक पाए म आयरन फोलिक एसिड दवाई दे जाही ।
