लइका स्वस्थ होही त छत्तीसगढ़ घलोक मजबूत बनही – श्री बघेल

रायपुर, 07 जुलाई 2021। मुख्यमंत्री श्री भूपेश बघेल ह आज इहां राजधानी रायपुर स्थित अपन निवास कार्यालय ले महिला अउ बाल विकास विभाग कोति ले 7 ले 16 जुलाई तक आंगनबाड़ी मन म मनाए जात प्रदेशव्यापी वजन त्यौहार के वर्चुअल शुभांरभ करिन। ये बेरा म मुख्यमंत्री के आगू लइका मन के वजन घलोक लेहे गीस। श्री बघेल ह कहिन के हमार लइका कहूं मजबूत होही, ताकतवर बनहीं, हमर बेटी मन म खून के कमी दूर होही त निश्चित रूप ले छत्तीसगढ़ मजबूत बनही। मुख्यमंत्री ह 5 साल तक के सबो लइका मन के अनिवार्य रूप ले वजन कराके ऊंखर सुपोषण स्तर के मूल्यांकन कराए अऊ किशोरी बालिका मन के हीमोग्लोबिन जांच करे के अपील करिन।
ये बेरा म श्री बघेल रायपुर जिला के धरसींवा विकासखण्ड स्थित बिरगांव अऊ दुर्ग जिला के पाटन स्थित गांव अटारी म आयोजित वजन त्यौहार कार्यक्रम म लइका मन के माता मन ले आंगनबाड़ी म मिलइया लाभ के बारे म घलोक जानकारी लीन। ये बेरा म स्कूल शिक्षा मंत्री डॉ. प्रेमसाय सिंह, महिला अउ बाल विकास मंत्री श्रीमती अनिला भेंडिया, मुख्य सचिव श्री अमिताभ जैन, मुख्यमंत्री के अपर मुख्य सचिव श्री सुब्रत साहू, मुख्यमंत्री के सचिव श्री सिद्धार्थ कोमल सिंह परदेशी, महिला अउ बाल विकास विभाग के सचिव श्रीमती रीना बाबा साहब कंगाले, संचालक समाज कल्याण श्री पी. दयानंद, संचालक महिला अउ बाल विकास विभाग श्रीमती दिव्या मिश्रा उपस्थित रहिन।
ये बेरा म मुख्यमंत्री श्री बघेल ह धरसीवां विकासखंड के बिरगांव म कार्यरत आंगनबाड़ी कार्यकर्ता सुश्री नीलू परगनिहा ले घलोक चर्चा करिन। मुख्यमंत्री ह आंगनबाड़ी कार्यकर्ता ले ओखर अनुभव अऊ कुपोषण के स्थिति के बारे म जानकारी लीन त नीलू ह बताइस के पहिली वोखर आंगनबाड़ी केंद्र म 7 मध्यम कुपोषित लइका रहिस। जेमे ले 5 लइका अब सामान्य हो गे हे, 2 लइका अभी मध्यम कुपोषित हे। वो बताइस के आंगनबाड़ी केंद्र म लइका मन ल मुख्यमंत्री बाल संदर्भ योजना के लाभ देहे के संग रेडी टू ईट के सामान अऊ गरम भोजन देहे जात हे। कुपोषित लइका मन के घर म जाके वोखर पालक मन ल लइका मन के खानपान ले संबंधित समझाईश घलोक देहे जाथे। चर्चा के समय मुख्यमंत्री श्री बघेल कुपोषण ले स्वस्थ होए लइका मन के माता श्रीमती संगीता साहू ले घलोक रूबरू होइन। मुख्यमंत्री कोति ले योजना ले मिले लाभ के जानकारी लेहे म श्रीमती साहू ह बताइस के कुपोषण के सेती वोखर लइका के वजन काफी कम रहिस, फेर आंगनबाड़ी कार्यकर्ता मन रेडी टू ईट के सामान अऊ ओखर उपयोग के बारे म जानकारी दीन तेकर से वो सामान्य होइस। मुख्यमंत्री श्री बघेल ह योजना ले लाभान्वित सबो माता अऊ लइका मन ल बधाई अउ शुभकामना दीन। उमन महिला मन ले ये योजना के अपन स्तर म जादा ले जादा प्रचार करे के बात कहिन।
बिरगांव म उपस्थित विधायक श्री सत्यनारायण शर्मा ह बताइस के महिला अउ बाल विकास विभाग अऊ आंगनबाड़ी कार्यकर्ता मन बेहतर काम करत हे। वजन त्यौहार म 1 लाख 61 हजार 20 लइका मन के वजन अऊ ऊंचाई के माप ले जाही। मुख्यमंत्री श्री बघेल ह कहिन कि महिला बाल विकास विभाग के संग सबो जनप्रतिनिधि वजन त्यौहार अउ कुपोषण मुक्ति के अभियान ल सफल बनाए बर जुटे हें, एकर लाभ निश्चित रूप ले समाज ल मिलत हे।