रइपुर 15 जून 2021 मंगल। राज्य सरकार कोति ले गँवइहा मन ल वन अधिकार पत्र देहे ले उन मन ल अपन जमीन म अधिकार मिले के संग आजीविका के साधन के रूप म बड़का सहारा मिलीस । बलरामपुर जिला म विकास कार्य के लोकार्पण अउ भूमि पूजन कार्यक्रम म मुख्यमंत्री दाउ भूपेश बघेल ह आज मुरका गांव के वनअधिकार पत्र पवइया श्री फूूलसाय अउ श्री राजाराम पोर्त ले वर्चुअल माध्यम ले गोठबात करत वन अधिकार पत्र ले उन्कर जीवन म आए बदलाव अउ सहूलियत के संबंध म जानकारी लीन अउ अपन किसानी के अनुभव ले उन मन ल जमीन के उत्पादन क्षमता बढ़ाए के सुझाव तको दीन ।
मुख्यमंत्री दाउ बघेल ले गोठियावत श्री राजाराम पोर्ते ह बताइन कि ओला 2 एकड़ जमीन के पट्टा मिले हे,जेमा डबरी अउ कुआं तको हे । कुंआ के पानी के उपयोग वोमन साग-सब्जी लगाए म अउ डबरी ले गहूं, सरसों बोथे अउ वोम मछली पालन करथे। मुख्यमंत्री दाउ बघेल के सब्जी के उत्पादन के संबंध म पूछे म श्री राजाराम ह बताइन कि दू ले अढई क्विंटल सब्जी उन् मन बेचे हवय। दाउ बघेल ह सब्जी के उत्पादन कम होए के कारण पूछे म श्री राजाराम ह नवा जमीन अउ उपजाऊ नई होना बताइन । येमा मुख्यमंत्री ह उन मन ल खेती-किसानी के गुर बतावत जमीन के उत्पादकता बढ़ाए बर वोमा वर्मी कम्पोस्ट डारे के सलाह दीन।
वइसनेहे श्री फूल साय ह बताइन कि वोला अढई एकड़ के वन अधिकार पत्र मिले हे जेमा एक ठो डबरी अउ एक ठो कुआं हे, कुआं म पानी हे जेमा ले सिंचई करथे अउ डबरी म मछली पालन करथे।
वन अधिकार पत्र गँवइहा मन बर आजीविका के साधन : मुख्यमंत्री ह दीन खेती किसानी के सुझाव
