जगदलपुर, 28 अगस्त 2021। केंद्रीय जनजाति मामला के मंत्री श्री अर्जुन मुण्डा बस्तर प्रवास के समय लोहण्डीगुड़ा विकासखण्ड के ग्राम धुरागांव म पहुंचके वनधन विकास केंद्र के काम मन के अवलोकन करिन। उमन ये वनधन विकास केंद्र म स्थानीय वनोपज मन के बेहतर प्रोसेसिंग के काममन के सराहना करत कहिन कि एखर माध्यम ले स्थानीय मनखे मन ल स्वरोजगार उपलब्ध होए के संगें-संग वनोपज संग्रहण कर्ता मन ल ऊंखर उत्पाद के वाजिब दाम मिल सकही। श्री मुण्डा वनधन विकास केंद्र के तैलीय बीज प्रसंस्करण कक्ष, वन प्रसंस्करण कक्ष, ईमली अउर महुआ प्रसंस्करण कक्ष आदि के अवलोकन कर वनोत्पाद के प्रोसेसिंग के अलावा एखर पैकेजिंग आदि के अवलोकन कर एखर संबंध म जानकारी लीन। ये दौरान केंद्रीय मंत्री श्री मुण्डा ह स्टाल म लगे उत्पाद मन के घलोक अवलोकन करिन।
श्री मुण्डा प्रोसेसिंग काम म लगे स्व-सहायकता समूह के महिला मन ले बात-चीत करके उंखर समस्या अऊ मांग मन के संबंध म जानकारी लीन। उमन ये काम म लगे स्व-सहायता समूह के महिला मन ल हर संभव मदद देवाए के आश्वासन घलोक दीन। श्री मुण्डा ह महिला अऊ उपस्थित मनखे मन ल अपन लइका मन के पढ़ाई-लिखाई के समुचित व्यवस्था करे अऊ पइसा के बचत करे ल कहिन। ये दौरान सांसद श्री दीपक बैज, ट्राईफेड के प्रबंध निदेशक श्री प्रवीण कृष्ण, छत्तीसगढ़ राज्य लघु वनोपज के प्रबंध निदेशक श्री संजय शुक्ला अऊ आन अधिकारी मन ह घलोक वनधन विकास के कार्यो अउर वनोपज के महत्व के संबंध म जानकारी दीन। ये बेरा म अपर प्रधान मुख्य वन सरंक्षक श्री डी. आंनद बाबू, संभागायुक्त श्री जी.आर. चुरेन्द्र, मुख्य वन सरंक्षक मोहम्मद शाहिद, कलेक्टर श्री रजत बंसल, वनमण्डाधिकारी सुश्री स्टायलो मंडावी अउर अपर कलेक्टर श्री अरविंद एक्का संग आन अधिकारीगण अउर जनप्रतिनिधिगण उपस्थित रहिन।
केंद्रीय मंत्री श्री मुण्डा ह करिस वन धन विकास केंद्र धुरागांव के काम मन ल सहराईन
