ग्राम चरौदा म छत्तीसगढ़ मनवा कुर्मी क्षत्रिय समाज के अधिवेशन
रायपुर, मुख्यमंत्री श्री भूपेश बघेल ह आज रायपुर जिला के ग्राम चरौदा म आयोजित छत्तीसगढ़ मनवा कुर्मी क्षत्रिय समाज के अधिवेशन ल संबोधित करत कहिन कि ये समाज के पुरखा अऊ विभूति मन ह केवल आजादी के लड़ाई भलुक छत्तीसगढ़ राज्य निर्माण म घलोक महत्वपूर्ण भूमिका निभाए हें। उमन शिक्षा, सहकारिता, कृषि के संगें-संग समाज सुधार जइसे उल्लेखनीय क्षेत्र मन म घलोक अपन बहुमूल्य योगदान देहे हें। ये एक प्रगतिशील समाज हे अऊ अइसन समाज म जन्म लेना गौरव के बात हे।
मुख्यमंत्री ह कहिन दू दिन बाद 17 दिसम्बर ले ये सरकार के एक साल पूरा होवत हे। पाछू एक साल म राज्य सरकार ह किसान मन, मजदूर, महिला, लइका मन, गांव वाले मन के संगें-संग नागरिक मन के हित बर बहुत अकन निर्णय लेहे हे। धान के रेट पूरा देश म सबले जादा छत्तीसगढ़ के किसान मन ल मिलत हे। बिजली के बिल आधा करे गए हे, बी.पी.एल के संगें-संग ए.पी.एल परिवार मन ल घलोक राशन मिलत हे। अभी हाल म केन्द्र शासन कोति ले निरधारित सबले कम समर्थन मूल्य म धान के खरीद करे जात हे। पाछू दू बछर म केन्द्र शासन कोति ले धान खरीदी बर बोनस देहे के अनुमति दिए गए रहिस। ये साल घलोक राज्य शासन कोति ले अनुमति मांगे गीस। किसान मन ल वायदा के मुताबिक पूरा राशि कोनो ना कोनो रूप म दिए जाही। उमन कहिन कि सरकार के खजाना आप मन के हे। धान के कीमत ये राज्य के किसान मन बर हे। हर किसान ल चाही कि ओ मन अपन अपन ऋण पुस्तिका के माध्यम ले केवल अपन खेत के धान ल ही बेचयं।
मुख्यमंत्री ह ये बेरा म ग्राम चरौदा के ऐतिहासिक मंदिर के पुनःनिर्माण बर 21 लाख रूपिया के राशि देहे के घोषणा करिन। उमन रायपुर म 27 ले 29 दिसम्बर तक होवइया राष्ट्रीय आदिवासी नृत्य उत्सव बर नागरिक मन ल आमंत्रित करिन। उमन कार्यक्रम म कई ठन क्षेत्र मन के उत्कृष्ट काम करइया समाज के मनखे मन ल सम्मानित करिन। उमन इहां पं. श्यामाचरण शुक्ल महाविद्यालय धरसींवा म सौ सीटर बालिका छात्रावास भवन के लोकार्पण करिन अऊ ग्राम पंचायत चरौदा म करीब साढ़े तीन करोड़ रूपिया राशि के कई ठन काम मन के लोकार्पण घलोक करिन।
कार्यक्रम ल संबोधित करत विधायक श्रीमती अनिता योगेन्द्र शर्मा ह राज्य अऊ क्षेत्र म करे जात काम मन के जानकारी दीन। समाज के केन्द्रीय अध्यक्ष डॉ. रामकुमार सिरमौर ह समाज बर काम करइया विभूति मन के उल्लेख करिन अऊ सामाजिक काम मन के जानकारी दीन। सरपंच श्री प्रदीप वर्मा ह आदर्श गौरव ग्राम चरौदा के काम मन के जानकारी दीन। ये बेरा म श्री दशरथ वर्मा ह स्वागत भाषण दीन अऊ मांग पत्र पढ़िन।
अरपा,पैरी के धार गीत म मुख्यमंत्री खड़े रहिन
कार्यक्रम के समापन के बाद जब मुख्यमंत्री मंच ले उतरत रहिन त उही बेरा म छत्तीसगढ़ के राजगीत ‘अरपा, पैरी के धार, महानदी हे अपार‘ बजे लगिस अऊ ये म बालिका मन ह छत्तीसगढ़ी परिधान म नृत्य शुरू करिन। मुख्यमंत्री ह तुरंते रूकके गीत बजत तक खड़े रहिन अऊ ये राजगीत ल पूरा मान -सम्मान दीन।