CHHATTISGARHI NEWS: सरगुजा। खेती ला लाभ के धंधा बनाए खातिर उद्यानिकी फसल अपनाए के कड़ी म लखनपुर विकासखंड के पोड़ी गांव के रहवइया किसान वासुदेव प्रधान ह खरीफ मौसम म एक हेक्टेयर म लौकी के खेती करके लगभग 2 लाख 7 हजार रूपिया के शुद्ध मुनाफा कमाए हे। उद्यानिकी विभाग के योजना अउ तकनीकी मार्गदर्शन के लाभ लेके वासुदेव ह वैज्ञानिक ढंग ले फसल प्रबंधन करिन, जेकर से वोला बेहतरीन पैदावार मिलिस।
एक हेक्टेयर खेत म लगभग 250 से 300 कुंटल लौकी के उत्पादन होइस। ए खेती म करीब 80 हजार रूपिया के लागत आइस, जबकि कुल आमदनी 2 लाख 87 हजार रूपिया मिलिस। लागत ला घटाए के बाद वोकर हाथ 2 लाख 7 हजार रूपिया के शुद्ध लाभ आए हे। विभागीय मार्गदर्शन अउ सही समय म कृषि कार्य करे ले वोला ए सफलता मिले हे।
पारंपरिक खेती के सीमित आमदनी के जघा उद्यानिकी खेती अपनाए ले वासुदेव के परिवार के आर्थिक स्थिति मजबूत होगे हे, अउ वोकर आत्मविश्वास घलो बाढ़े हे। अब वो दूसर किसान मन ला घलव उद्यानिकी खेती करे अउ सरकारी योजना मन के लाभ उठाए बर प्रेरित करत हे।
लखनपुर के किसान वासुदेव प्रधान ला लौकी (तूमा) खेती ले मिलिस 2 लाख ले जादा के शुद्ध लाभ
