20 अगस्त के ग्राम सभा म वीबी-जीरामजी योजना के बूता मन ल मिलही मंजूरी

रायपुर, विकसित भारत-रोजगार अउ आजीविका गारंटी मिशन (ग्रामीण) मने ‘वीबी-जीरामजी’ योजना के तहत आबंटित बूता मन ल मंजूरी देहे बर 20 अगस्त के सबो गांव म ग्राम सभा के बइठक रखे गे हे। ए बइठक म वित्तीय बछर 2026-27 बर गांव के जरूरत के हिसाब ले विकास काम मन के चयन अउ अनुमोदन करे जाही।
मुख्यमंत्री श्री विष्णुदेव साय के मुाबिक, योजना के तहत सबो काम ग्राम सभा के मंजूरी ले ही होही। चालू वित्तीय बछर म मनरेगा अउ वीबी-जीरामजी ले राज्‍य ल लगभग 6,855 करोड़ रुपिया मिलही। बछर 2026-27 बर 5,591.42 करोड़ रुपिया के बजट रखे गे हे, जेमा केंद्र सरकार ले पहली किस्‍त के रूप म 1,538 करोड़ रुपिया ले जादा के मंजूरी मिल चुके हे।
ए योजना म 318 किसम के बूता मन ल चार श्रेणी—जल संरक्षण (107), ग्रामीण अधोसंरचना (90), आजीविका संवर्धन (86) अउ जलवायु अनुकूलन (35) म बांटे गे हे। संगेच, 15 अगस्त ले 26 जनवरी 2027 तक चलइया ‘मेरी बेटी, मेरा अभिमान’ अभियान के तहत मुक्तिधाम, प्रतीक्षालय अउ सरकारी इस्कूल मन म नोनी मन बर संडास (शौचालय) बनाए के काम घलो ग्राम सभा के सहभागिता ले करे जाही।
20 अगस्त के ग्राम सभा म मिलईया सुझाव के आधार म 2 अक्टूबर ले ‘विकसित ग्राम पंचायत योजना’ (वीजीपीपी) बनाए के काम सुरू होही। योजना के मकसद खेती-किसानी के बेरा म मजदूर मन के सुविधा ल धियान म रखत, गांव मन म रोजगार अउ बुनियादी सुविधा मन के तेजी ले बिकास करना हे।