राजधानी के माना एयरपोर्ट म देहे गीस भावभीनी श्रद्धांजलि
हम सब देश के संग हन, सेना के संग हन अऊ जवान मन के संग हन: मुख्यमंत्री श्री भूपेश बघेल
गिधाली के शासकीय स्कूल के नामकरण शहीद गणेश राम कुंजाम के नाम म करे के घोषणा
परिवार के एक सदस्य ल देहे जाही शासकीय नौकरी
मुख्यमंत्री ह शहीद के पिता श्री इतवारू राम कुंजाम ल 20 लाख रूपिया अनुग्रह राशि के चेक सौंपिन
रायपुर, 18 जून 2020। मुख्यमंत्री श्री भूपेश बघेल ह आज राजधानी रायपुर के माना स्थित स्वामी विवेकानंद एयरपोर्ट म छत्तीसगढ़ के माटी पुत्र शहीद जवान श्री गणेश राम कुंजाम के पार्थिव शरीर म पुष्पचक्र अर्पित करके भावभीनी श्रद्धांजलि दीन। विमानतल म शहीद श्री कुंजाम ल गॉर्ड ऑफ ऑनर दे गीस। मुख्यमंत्री ह शहीद श्री कुंजाम के पार्थिव शरीर ल कांधा देके विदाई दीन। विमानतल ले हेलीकाफ्टर ले शहीद के पार्थिव शरीर अंतिम संस्कार बर ऊंखर गृह ग्राम गिधाली कांकेर बर रवाना करे गीस।
आप मन जानतेच हव के लद्दाख म एल.ए.सी. म चीनी सेना के संग होए हिंसक झड़प म भारतीय सेना के 20 जवान शहीद हो गीन। ये हिंसक झड़प म छत्तीसगढ़ के कांकेर जिला के कुरूटोला ग्राम पंचायत के ग्राम गिधाली निवासी श्री गणेश राम कुंजाम घलोक शहीद हो गीस। शहीद श्री कुंजाम के पार्थिव शरीर आज मंझनिया विशेष विमान ले रायपुर पहुंचिस।
मुख्यमंत्री श्री बघेल ह लद्दाख म शहीद होए जवान मन के अदम्य साहस अऊ बलिदान ल नमन करिन अऊ शहीद मन के परिजन मन के प्रति शोक संवेदना व्यक्त करिन। मुख्यमंत्री ह कहिन के स्वर्गीय श्री कुंजाम ह देश बर शहादत देहे हें। अइसन महान सपूत उपर हम छत्तीसगढ़वासी मन ल गर्व हे। उंखर शहादत फोकट नइ जाए। हम सब देश के संग हन, सेना के संग हन अऊ जवान मन के संग हन। मुख्यमंत्री ह शहीद स्वर्गीय श्री गणेश राम कुंजाम के सुरता ल अमर बनाए रखे बर गांव के शाला के नामकरण ऊंखर नाम म करे के घोषणा करिन। मुख्यमंत्री ह कहिन के शहीद श्री कुंजाम के परिवार के एक सदस्य ल शासकीय नौकरी देहे जाही। मुख्यमंत्री ह ये मौका म शहीद स्वर्गीय श्री कुंजाम के पिता श्री इतवारू राम कुंजाम ल छत्तीसगढ़ शासन कोति ले 20 लाख रूपिया के अनुग्रह राशि के चेक सौंपिन।
ये बेरा म गृहमंत्री श्री ताम्रध्वज साहू, कृषि मंत्री श्री रविन्द्र चौबे, खाद्य मंत्री श्री अमरजीत भगत, नगरीय प्रशासन मंत्री डॉ शिवकुमार डहरिया, स्कूल शिक्षा मंत्री डॉ प्रेमसाय सिंह टेकाम, पूर्व मुख्यमंत्री डॉ रमन सिंह, विधायक सर्वश्री सत्यनारायण शर्मा, बृजमोहन अग्रवाल, कुलदीप जुनेजा अऊ विकास उपाध्याय, सांसद श्री सुनील सोनी, महापौर श्री एजाज ढेबर, मुख्य सचिव श्री आर. पी. मण्डल, पुलिस महानिदेशक श्री डी. एम. अवस्थी, मुख्यमंत्री के अपर मुख्य सचिव श्री सुब्रत साहू, संग बहुत अकन जनप्रतिनिधि, सेना, प्रशासन, पुलिस के वरिष्ठ अधिकारी मन अऊ नागरिक मन ह शहीद श्री कुंजाम के पार्थिव शरीर म पुष्पचक्र अर्पित करके श्रद्धांजलि दीन। एखर पाछू शहीद श्री कुंजाम के पार्थिव शरीर ऊंखर गृह ग्राम बर रवाना करे गीस।