मुख्यमंत्री ह सब्जी, फल अऊ जरूरी जिनिस मन के सुचारू आपूर्ति अऊ कालाबाजारी उपर कड़ाई ले रोक लगाए के देहे रहिन निर्देश
रायपुर, 28 मार्च 2020। मुख्यमंत्री श्री भूपेश बघेल के निर्देश के तुरंते बाद सबो सब्जी मन के दाम करीबन आधा हो गे हे। काल जिहां भिंडी, भांटा, गोभी अऊ टमाटर के दाम 40 रूपिया के करीब रहिस आज वो सीधा आधा 20 रूपिया किलो हो गे हे।
जानबा हे के मुख्यमंत्री श्री भूपेश बघेल ह काल जनता के नाम प्रेषित अपन संदेश म कहे हें के, कोरोना वायरस ले बचाव अऊ एखर फैलाव ल रोके बर 21 दिन के लॉक डाउन के समय राज्य म जरूरी समान मन के आपूर्ति के पुख्ता इंतजाम हे। संगेच कलेक्टर मन ल कालाबाजारी उपर कड़ाई ले रोक लगाय के निर्देश घलव उमन देहे हें। श्री बघेल ह लॉक डाउन के बेरा म जरूरी समान मन के कोनो कमी झन होवय ए खातिर सबो जिला प्रशासन ल जरूरी कदम उठाए के हुकुम देहे हें। जेखर सीधा लाभ आज जनता ल मिलत हे।
मुख्यमंत्री ह ये घलोक कहे रहिन के कुछ जगा मन म लॉक डाउन के संकट के लाभ उठाके कुछ व्यापारी मन ह जरूरी समान मन के दाम बढ़ा देहे हें अऊ कुछ मनखे कालाबाजारी म लग गए हें। ये बहुतेच आपत्तिजनक हे। उमन कहे रहिन के, व्यापारी भाई मन ले निवेदन हे के ओ मन अनुचित लाभ झन उठावयं अऊ सेवा भाव ले मनखे मन ल दैनंदिनी जरूरत वाले वस्तु मन के आपूर्ति करव। हम कोनो कीमत म कालाबाजारी होए नइ दन। उमन सबो कलेक्टर मन ल निर्देश देहे रहिन के कालाबाजारी करइया ले कड़ाई ले निपटयं अऊ आम जनता ल सही दाम म समान उपलब्ध कराए के व्यवस्था करयं। कलेक्टर मन ल ये घलोक निर्देश देहे गे हे के जरूरी समान, सब्जी, फल आदि के परिवहन के व्यवस्था म कोनो बाधा झन आवय। जऊन मनखे साग-भाजी, फल आदि के काम ले जावत हे, ओ मन ल रोके झन जाय। साग-भाजी अऊ फल के सबो ल जरूरत हे। एखर निरंतर आपूर्ति बने रहय।
