जांजगीर-चांपा, 23 अप्रैल 2020। किसान मन म परम्परागत धान फसल के बजाय सब्जी, मसाला अऊ फूल के खेती कोति आकर्षण बाढ़त जात हे। प्रदेश के जांजगीर-चांपा जिला म ये साल अड़बड़ झन किसान ए फसल के खेती करत हें। जिला म किसान मन के खेत मन म 14.005 हेक्टेयर म फलदार पौधा के रोपण करे गए हे। उहें नदी कछार तट म 7 हेक्टेयर ले जादा क्षेत्र म किसान मन सब्जी के उत्पादन करत हें।
जिला प्रशासन के पहल म जिला खनिज न्यास मद के राशि ल सब्जी-मसाला क्षेत्र अऊ स्प्रिंकलर सिंचाई अऊ नरवा, गरूवा, घुरवा अऊ बाड़ी विकास बर घलोक उपयोग करे जात हे। उद्यानिकी विभाग कोति ले जांजगीर-चांपा जिला म संचालित कई ठन योजना मन के तहत सब्जी, मसाला, पुष्प उत्पादन अऊ फलदार पौधा के रोपण ल बढ़ावा देहे जात हे। किसान मन योजना मन के लाभ लेके बाड़ी म सिंचाई सुविधा ल विकसित करे के संगें-संग सुरक्षा बर फेंसिंग काम घलोक करत हें। गांव म बनाए जात गौठान मन म घलोक फलदार पौधा के रोपण करे गए हे।
मिले जानकारी के मुताबिक राज्य पोषित योजना के तहत जांजगीर म 14.005 हेक्टेयर म फलदार पौधा के रोपण करे गए हे। अइसनहे नदी कछार तट मन म 7 हेक्टेयर ले जादा क्षेत्र म किसान मन सब्जी के उत्पादन करत हें। ये योजना के तहत 1.5 हेक्टेयर म सूक्ष्म सिंचाई (ड्रिप) के सुविधा देहे गए हे। बाड़ी के सुरक्षा बर 7.23 हेक्टेयर म सामुदायिक फेंसिंग के काम हो गए हे। राष्ट्रीय कृषि विकास योजना के तहत 32.08 हेक्टेयर म फल सब्जी मसाला अउ फूल के खेती करे जात हे। फल 3.51 हेक्टेयर म सब्जी 21.07 हेक्टेयर म अऊ फूल के खेती 7.5 हेक्टेयर म करे जात हे।
