मुख्यमंत्री श्री विष्णुदेव साय ह विजय दिवस म शहीद मन ल करिन नमन

रायपुर/ मुख्यमंत्री श्री विष्णु देव साय ह विजय दिवस (16 दिसंबर) के मौका म देस के वीर शहीद मन ल सरद्धा से नमन करिन। मुख्यमंत्री श्री साय ह कहिन के विजय दिवस भारतीय सेना के शौर्य, साहस अउ अदम्य पराक्रम के गौरवपूर्ण चिन्हारी आय, जेन ह देसवासी मन के हिरदे म गरब अउ कृतज्ञता के भाव जगाथे।
मुख्यमंत्री श्री साय ह 1971 के ऐतिहासिक लड़ई ल सुरता करत कहिन के हमर वीर जवान मन ह गजब के साहस, तियाग अउ बलिदान के परिचय दे के देस के अखंडता अउ संप्रभुता के रक्छा करिन। उंकर पराक्रम ले न सिरिफ भारत के सैन्य ताकत दुनिया म स्थापित होइस, भलुक मानवीय मूल्य अउ रास्‍ट्र-धरम के मिसाल घलो बनिस।
मुख्यमंत्री ह कहिन के शहीद मन के बलिदान आवइया पीढ़ी बर देस-भक्ति, कर्तव्यनिष्ठा अउ समर्पण के अमर प्रेरणा बनही। उमन प्रदेशवासी मन ले आह्वान करिन के ओ मन देस-भक्ति, अनुशासन अउ एकता के मूल्य ल अपनावत रास्‍ट्र निर्माण म अपन सक्रिय भागीदारी निभावंय।
मुख्यमंत्री श्री साय ह कहिन के शहीद मन के बताय रद्दा म चलना, देस हित ल सबले ऊपर रखना अउ देस सेवा बर हमेशा तैयार रहना ही विजय दिवस म ओ मन ल सच्चा अउ स्थायी सरद्धांजलि ए।