रायपुर। विधानसभा बजट सत्र म पहुंचे कांग्रेस विधायक लक्ष्मी ध्रुव आज सबले अलग अंदाज म दिखाई दिस. जेखर भी नजर उमन के उपर पडिस वो टकटकी लगाए देखत ही रहगे. नेता मन उंखर खूब तारीफ करिन. एखर वजह विधायक के लुगरा हे. उंखर ये लुगरा म अइसे का खास हे ?
बात अइसे हे कि धमतरी जिला के सिहावा ले कांग्रेस विधायक लक्ष्मी ध्रुव ह अपन बर एक स्पेशल लुगरा बनवाये हे. जोन म छत्तीसगढ़ के राज गीत लिखे गए हे. साड़ी म लिखे गए हे …’अरपा पैरी के धार महानदी हे अपार, इंदिरावती हर पखारय तोरे पईयां, महूं विनती करव तोर भुँइया, जय हो जय हो छत्तीसगढ़ मईया’. ये गीत ल कांग्रेस सरकार ह राज गीत घोषित कर देहे. एखर रचयिता महान भाषाविद स्व. नरेंद्र वर्मा हे.
राज गीत लिखे साड़ी म विधायक लक्ष्मी ध्रुव अब्बड़ सुघ्घर दिखत हे. कैमरा ल आगु देख वो पोज देवत घलो नजर आइन अउ खिलखिला उठीन. एखर पहली भी कई घाव विधानसभा म देखे गए हे कि नेता एक साथ एक ड्रेस म दिखाई देहे. बता देन कि विधानसभा के आज ले बजट सत्र शुरु होगे हे, जो कि एक अप्रैल तक चलही.
विधानसभा म सबले अलग अंदाज म दिखिन कांग्रेस विधायक लक्ष्मी ध्रुव
