सेना के शौर्य ले युवा मन ले मिलथे देश के रक्षा बर प्रेरणा: उपमुख्यमंत्री श्री विजय शर्मा

छत्तीसगढ़ के युवाओं के अग्निवीर योजना म भागीदारी बढ़ाने संभाग स्तरीय कार्यशाला
रायपुर, 18 जनवरी 2024 । देश के सुरक्षा म लगे जवान मन के शौर्य युवा शक्ति ल सेना म जाय बर प्रेरित करथे। कोनो देश के रक्षा के दारोमदार युवा शक्ति के हाथ म होथे, एला देखत हमन छत्तीसगढ़ के युवा मन ल जादा ले जादा संख्या म अग्निवीर के रूप म सेना म सहभागिता बढ़ाए बर कार्यशाला के आयोजन करे हन। मोला विश्वास हे कि युवा मन बर ये कार्यशाला उपयोगी होगी। सेना म उंखर सहभागिता बाढ़ही। संगेच राज्य के युवा अग्निवीर योजना ले जुड़हीं। उपमुख्यमंत्री श्री विजय शर्मा आज इहां स्थानीय शहीद स्मारक भवन म अग्निवीर के भर्ती के संबंध म आयोजित कार्यशाला ल सम्बोधित करत रहिन।
उप मुख्यमंत्री श्री शर्मा ह देश के पहिली प्रधानमंत्री, भारत रत्न स्वर्गीय श्री अटल बिहारी वाजपेयी के कथन ल सुरता करत कहिन कि सरकार आथे, जाथे, सरकार आत, जात रइही, फेर लोकतंत्र हमेसा अमर रहिथे। लोकतांत्रिक व्यवस्था के मजबूती बर शांति अऊ सुरक्षा जरूरी हे। हमर सेना ये काम बखूबी करत हे। उमन कहिन कि भारत के सीमा कोनो आन देश के सीमा ले जादा विविधता अऊ चुनौती भरे हे। सेना म जाके युवा मन ही ए चुनौती ल स्वीकार करथें। उमन कहिन कि ये खुशी के बात हे कि छत्तीसगढ़ के युवा मन म घलोक देश के सीमा के रक्षा करे के भाव हे आप मन सबो देश बर सर्वाेच्च बलिदान करे खातिर तैयार हे। ए खातिर में आप मन के आभार व्यक्त करथंव।
उपमुख्यमंत्री ह कहिन कि हमर सेना ल हमला भरपूर सम्मान देना चाही। उमन कहिन कि जब मैं ट्रेन म सफर करथंंव अऊ मोर आगू कोनो जवान आथे, त सबले पहिली में खड़ा होके ओ जवान के प्रति सम्मान के भाव व्यक्त करथंव। मोर आप मन ले आग्रह हे कि अइसनहे सम्मान के भाव सेना के जवान मन के प्रति व्यक्त करव।
ए मौका म उमन अधिकारी मन ले छत्तीसगढ़ राज्य ले जादा ले जादा युवा मन के चयन अग्नि वीर भर्ती बर होवय, एखर बर जरूरी व्यवस्था ठउका करे के निर्देश दीन।
उपमुख्यमंत्री श्री शर्मा ह कहिन कि अग्निवीर भर्ती परीक्षा बर सोशल मीडिया संग आन माध्यम ले व्यापक प्रचार प्रसार करे जाए। उमन कहिन कि ऑनलाइन पंजीयन, आवेदन, वेबसाइट के जानकारी, लिखित परीक्षा, भर्ती रैली अउ चिकित्सा परीक्षण संग आन जरूरी निर्देश के जानकारी कई माध्यम ले युवा मन तक पहुंचाए जाय। जेन राज्य के जादा ले जादा युवा मन ल लाभ मिल सकय। उमन अग्निवीर योजना म ऑनलाईन आवेदन के प्रक्रिया पूरा कराए बर चॉइस सेंटर के संचालक मन ल घलोक ट्रेनिंग देहे के निर्देश दीन।