- मुख्यमंत्री ह करिस 291 करोड़ रूपिया लागत के 142 विकास काम मन के लोकार्पण-भूमिपूजन
- गांव वाले मन के आग्रह म 21.36 करोड़ रूपिया लागत के 19 नवा निर्माण काम मन के दीन स्वीकृति
- एरमनार ले तोयनार तक 10 किलोमीटर डामर वाले सड़क बनही
- पोटामपारा ले रेड्डी संग कोंगूपल्ली ले संकनपल्ली तक बनही डामर वाले सड़क
रायपुर, मुख्यमंत्री श्री भूपेश बघेल ह आज बीजापुर के मिनी स्टेडियम म आयोजित विशाल पंच-सरपंच अऊ किसान सम्मेलन ल सम्बोधित करत कहिन कि विकसित अऊ खुशहाल बीजापुर जिला के सपना जल्दी साकार होही। बस्तर के ये दूरस्थ जिला म विकास के असीम संभावना हवय, ये जिला के पूरा विकास बर राज्य सरकार हरसंभव उदीम करत हे। जिला के अंदरूनी इलाका म 16 नवा सड़क बनाए गए हे। अभी 69 करोड़ 65 लाख रूपिया लागत के 60 नवा सड़क मन के निर्माण करबोन अऊ 71 करोड़ 75 लाख रूपिया के 6 बड़े पुल बनाबोना। इही भर नइ जिला के सबो क्षेत्र मन म विकास के काम मन ल तेजी के संग सुनिश्चित करे जाही अऊ इहां के मनखे मन ल विकास ले जोड़े बर विशेष पहल करे जाही।
मुख्यमंत्री श्री बघेल ह ये बेरा म 291 करोड़ रूपिया लागत के 142 निर्माण अऊ विकास काम मन के लोकार्पण अऊ भूमिपूजन करिन। जिला खनिज न्यास निधि के तहत सामुदायिक स्वास्थ्य केन्द्र उसूर अऊ गंगालूर बर दू नवा एम्बुलेंस ल हरियर झण्डी दिखाके रवाना करिन। ये मौका म मुख्यमंत्री ह गांव वाले मन के आग्रह म 21 करोड़ 36 लाख रूपिया लागत के 19 नवा निर्माण अऊ विकास काम मन के मंजूरी दीन। उमन एरमनार ले तोयनार तक 10 किलोमीटर डामरीकृत सड़क निर्माण बर 6 करोड़ रूपिया, कोंगूपल्ली ले संकनपल्ली तक 15 किलोमीटर डामरीकृत सड़क निर्माण बर एक करोड़ रूपिया, पोटामपारा ले रेड्डी तक डामरीकृत सड़क निर्माण बर 3 करोड़ रूपिया, बीजापुर महादेव तालाब गहरीकरण अऊ सौंदर्यीकरण बर डेढ़ करोड़ रूपिया, सबो 4 ब्लॉक मन के प्रमुख तालाब मन के गहरीकरण बर 5 करोड़ रूपिया संग 10 करोड़ 50 लाख रूपिया लागत के 14 आन निर्माण अऊ विकास काम मन के मंजूरी दीन।
ये बेरा म प्रदेश के राजस्व मंत्री अऊ प्रभारी मंत्री बीजापुर श्री जयसिंह अग्रवाल, स्कूल शिक्षा मंत्री डॉ प्रेमसाय सिंह टेकाम, विधायक कोंडागांव श्री मोहन मरकाम, विधायक दन्तेवाड़ा श्रीमती देवती महेन्द्र कर्मा, जिला पंचायत अध्यक्ष बीजापुर श्रीमती जमुना सकनी संग क्षेत्र के बहुत अकन जनप्रतिनिधि अऊ अड़बड़ झन म ग्रामीण मौजूद रहिन।
