बीटीआई ग्राउण्ड शंकर नगर म लगे ग्रामोद्योग प्रदर्शनी ल मिलत हे शानदार प्रतिसाद

काटन, कोसा के लुगरा अऊ सूट ल महिला मन जमके बिसावत हें
रायपुर, शंकर नगर स्थित बीटीआई ग्राउंड म लगे ग्रामोद्योग प्रदर्शनी ल मनखे मन के उत्साहजनक प्रतिसाद मिलत हे। प्रदर्शनी म छत्तीसगढ़ के उत्कृष्ट बुनकर, हस्तशिल्पी, माटी शिल्पी मन कोति ले बनाए गए उत्पाद जइसे कोसा अऊ काटन के लुगरा, बेडशीट, ड्रेस मटेरियल, सूट, कॉटन बैग, कोसा शाल, जैकेट, बेलमेटल, काष्ठ-बॉस शिल्प, लौहशिल्प चीज मन ल बिसाए बर रोजेच मनखे बड़ संख्या म इहां पहुंचत हें। हस्तशिल्प अऊ सजावटी समान मनखे मन के आकर्षण के केन्द्र बने हे। घर म सजावट बर मनखे ए मन ल बिसावत हें।
जानबा हे के ग्रामोद्योग के ये प्रदर्शनी 7 अगस्त राष्ट्रीय हाथकरघा दिवस के अवसर म शुरू होए रहिस, जेन 31 अगस्त तक चलही। हाथकरघा विभाग कोति ले ए प्रदर्शनी म विक्रय बर उपलब्ध चीज मन म सबले अधिक 60 प्रतिशत तक के छूट देहे जात हे। प्रदर्शनी म राज्य के बुनकर अऊ शिल्पकार मन कोति ले तियार आनी-बानी के उत्पाद प्रदर्शन अऊ विक्रय बर उपलब्ध कराए गे हे।
ग्रामोद्योग विभाग के सचिव सह-संचालक श्री श्याम धावड़े ह बताइस के प्रदर्शनी म बड़ संख्या म महिला मन पहुंचके अपन पसंद के परिधान अऊ वस्त्र मन के संगे-संग हस्तशिल्प मन के खरीदी करत हें। इहां गोदना शिल्प, शीसल शिल्प अऊ हाथकरघा वस्त्र म कोसा सिल्क, टसर सिल्क, कॉटन के ड्रेस मटेरियल, साड़ी, टुपट्टा, चादर, बेडशीट अऊ खादी वस्त्र अऊ ग्रामोद्योग ले बने जिनिस मन ह मनखे मन ल लोभावत हे। तिहार मन के सीजन म भारी छूट के संग ये प्रदर्शनी मनखे मन बर एक सौगात हे। छत्तीसगढ़ राज्य हाथकरघा विपणन संघ के सचिव श्री एम.एम. जोशी ह बताइस के ग्रामोद्योग के उत्पाद मन के प्रदर्शनी म अड़बड़ बिक्री होवत हे। मनखे इहां लगाए गे कई ठन स्टॉल मन म पहुंचके किफायती कीमत म मिलइया पारंपरिक वस्त्र अऊ हस्तशिल्प अऊ सजावटी चीज मन ल बिसावत हें।