प्रधानमंत्री ग्राम सड़क योजना म पक्की सड़क अऊ घर तक सौभाग्य योजना म पहुंचत हे बिजली
कोण्डागांव, 20 दिसंबर 2023। छत्तीसगढ़ के नक्सल प्रभावित क्षेत्र मन के तस्वीर बदलत हे। गांव म बिजली पहुंचे ले आधुनिक सुख-सुविधा मन के गांव वाले मन बने उपयोग करत हें। ए क्षेत्र मन म प्रधानमंत्री सड़क योजना के सड़क नेटवर्क के संगें-संग बिजली के घलोक नवा नेटवर्क तियार होवत हे।
कोण्डागांव जिला के बुड़ती कोति अतिसंवेदनशील क्षेत्र म बसे कुधूर गांव पिछड़ापन अऊ विकास के रोशनी ले अछूता रहिस। अतिसंवेदनशील जगा मन म नक्सल घटना ए इलाका मन के विकास म सबले बड़े बाधा रहिस। अब इहां के तस्वीर बदलत जात हे। बिजली अऊ सड़क के सुविधा मिले ले मनखे मन के सामाजिक, आर्थिक विकास के नवा रद्दा खुले हे।
अब इहां प्रधानमंत्री सौभाग्य योजना ले गांव म बिजली के लाइन पहुंचत हे। गांव के मनखे बहुत खुश हे कि अब गांव आए बर प्रधानमंत्री ग्राम सड़क योजना ले सड़क घलोक बन गए हे। गांव म अब आटाचक्की, फोटो कापी दुकान जइसे दुकान घलोक खुल गए हे। मोबाइल टावर लगे ले पूरा दुनिया ले इंटरनेट के माध्यम ले युवा मन जुड़त हें अऊ नवा नवा कौशल घलोक सीखत हें।
कुधूर गांव के सरपंच लक्ष्मण कश्यप बताथे कि गांव म बिजली नइ रहिस। तब घर वाले मन ह वोला पढ़े बर गीदम म सगा के घर भेज दे रहिन। इहां फोटोकॉपी दुकान चलइया सविता कश्यप के बताती घर म पहिली खेती के अकतहा आन कोनो व्यवसाय घलोक नइ होत रहिस। बिजली कनेक्शन आए ले अब पढ़ई लिखाई के दिक्कत दूर हो गे। सविता ह एक साल ले घर म फोटोकॉपी के संग किराना दुकान शुरू करे हे। दुकान म फ्रिज घलोक रखे हे जेखर से गर्मि म कोल्ड ड्रिंक घलोक बेचथे। जेखर से वोकर आमदनी म इजाफा होए हे।
कुधूर म उपस्वास्थ्य केन्द्र म पदस्थ आरएचओ पिलाराम कोर्राम ह बताइस कि बिजली नइ होए ले गंभीर रोगी मन ल तुरंते रिफर करना परत रहिस। महिला मन ल प्रसव के एक महिना पहिलीच गांव छोड़के तीर-तखार के अपन रिश्तेदार मन के गांव म जाना परत रहिस। पक्की सड़क नइ होए ले एम्बुलेंस घलोक गांव नइ आ पात रहिस। अब प्रसव के संग उत्कृष्ट स्वास्थ्य सेवा घलोक हम गांव वाले मन ल कुधूर म ही दे पात हन।
भारत सरकार ह शत-प्रतिशत ग्रामीण विद्युतीकरण हासिल करे के दिशा म कदम बढ़ात देश के सबो गैर-विद्युतीकृत घर मन के विद्युतीकरण हासिल करे म घलोक ध्यान केंद्रित करे हे। ये लक्ष्य ल हासिल करे बर भारत सरकार ह अक्तूबर, 2017 म प्रधानमंत्री सहज बिजली हर घर योजना-सौभाग्य-योजना के शुरूआत करे हे। ये योजना के तहत सबो अविद्युतीकृत घर म आखरी छोर के गांव तक विद्युत कनेक्टिविटी अऊ विद्युत कनेक्शन देहे के प्रावधान रखे गए हे।