रायगढ़, मुख्यमंत्री श्री भूपेश बघेल आज अपन भेंट-मुलाकात कार्यक्रम के समय रायगढ़ जिला के लैलूंगा विधानसभा क्षेत्र के कुंजेमुरा गांव पहुंचिन। मुख्यमंत्री ले मिले गांव वाले मन म जबर्दस्त उत्साह दिखाई दीस। मुख्यमंत्री ह तमनार विकासखंड स्थित कुंजेमुरा के श्री हनुमान मंदिर पहुंचके पूजा-अर्चना करिन अऊ प्रदेशवासी मन के सुख-समृद्धि अऊ खुशहाली के कामना करिन। मुख्यमंत्री श्री बघेल ह कुंजेमुरा के गलि मन म पैदल चलके गांव वाले मन ले मुलाकात करिन अऊ उंखर हालचाल जानिन। गांव वाले मन ह घलोक मुख्यमंत्री के रंगोली सजाके, दीप जलाके अऊ आरती उतार के स्वागत करिन। ये बेरा म स्कूल शिक्षा मंत्री डॉ. प्रेमसाय सिंह टेकाम संग कई जनप्रतिनिधि अऊ अधिकारी मौजूद रहिन।
देवारी तिहार म किसान मन ल मिलही राजीव गांधी किसान न्याय योजना के तीसर किस्त
रायगढ़, मुख्यमंत्री श्री भूपेश बघेल ह आज रायगढ़ जिला के खरसिया विधानसभा के ग्राम चपले म भेंट मुलाकात कार्यक्रम म आम जनता ले रू-ब-रू होके राज्य शासन के योजना मन के क्रियान्वयन के स्थिति के जानकारी लीन। उमन ये बेरा म अपन सम्बोधन म देवारी तिहार म किसान मन ल राजीव गांधी किसान न्याय योजना के तीसर किस्त देहे के घोषणा करिन। मुख्यमंत्री ह जमीन के गुणवत्ता अऊ उर्वरता ल बनाए रखे बर किसान मन ले वर्मी कम्पोस्ट के उपयोग करे के आग्रह करिन। उमन कहिन कि राज्य के गौठान मन म वर्मी कम्पोस्ट बनत हे। एकर जादा ले जादा उपयोग करना चाही। एखर पहिली मुख्यमंत्री ह छत्तीसगढ़ महतारी के पूजा अर्चना करके भेंट-मुलाकात कार्यक्रम के शुरूआत करिन।
