मुख्यमंत्री के संवेदनशीलता के जताइन गांव वाले मन ह आभार
रायपुर, 09 अगस्त 2024। मुख्यमंत्री जनदर्शन म आज बालोद जिला के विकासखंड गुंडरदेही अंतर्गत ग्राम पंचायत खपरी ब के पंचायत प्रतिनिधि मन के संग ग्रामीणजन अपन मांग अऊ समस्या मन ल लेके पहुंचे रहिन। मुख्यमंत्री श्री विष्णु देव साय ह ए म जल्दी कार्रवाई के निर्देश संबंधित अधिकारी मन ल देहे हें।
सरपंच श्रीमती जनक बाई साहू ह मुख्यमंत्री ल बताइस के ग्राम ईरागुड़ा ले पायला पहुंच मार्ग के स्थिति बहुतेच जर्जर हो गए हे, जेखर से अवइया-जवइया मन ल आए-जाए म अड़बड़ परेशानी होथे। गांव के गली मन पक्की नइ होए के सेती बरसात म वोमा चिखला भरे रहिथे। उमन गांव म कला मंच बनाए अऊ आश्रित ग्राम भोथीपार ल स्वतंत्र पंचायत बनाए के घलोक मांग करिन। जनप्रतिनिधि मन ह बताइन के गुंडरदेही म स्वामी आत्मानंद स्कूल संचालित हे फेर भवन नइ होए के सेती पढ़ाई म व्यवधान होवत हे। मुख्यमंत्री श्री विष्णु देव साय ह उंखर बात ल गंभीरता ले सुनके लउहे समस्या मन के समाधान करे के बात कहीन। संगेच आन मांग मन ल घलोक पूरा करे के आश्वासन दीन।
मुख्यमंत्री श्री विष्णु देव साय ले मांग ल पूरा करे के आश्वासन ले ग्रामीण उत्साहित नजर आइन। उमन बताइन के मुख्यमंत्री अड़बड़ संवेदनशील हे हमर मांग पूरा करे जात हे एखर बर हम ऊंखर प्रति आभार व्यक्त करत हन। ए अवसर म उप सरपंच सांतत राम साहू, चुन्नू राम साहू, गोपाल, सुरीत लाल सुख नंदन श्रीमती केश लता, श्रीमती योग लता, श्रीमती भारती संग सबो पंचगण उपस्थित रहिन।