मुख्यमंत्री ह आचार्य विनोबा भावे के पुण्यतिथि म ओ मन ल नमन करिन

रायपुर, मुख्यमंत्री श्री भूपेश बघेल ह स्वतंत्रता संग्राम सेनानी, सामाजिक कार्यकर्ता, प्रसिद्ध गांधीवादी नेता अऊ भूदान आन्दोलन के सूत्रधार आचार्य विनोबा भावे के पुण्यतिथि 15 नवम्बर म ओ मन ल नमन करे हें। श्री बघेल ह आचार्य विनोबा भावे ल सुरता करत कहिन कि भारतरत्न अऊ मेगससे पुरस्कार ले सम्मानित श्री भावे रचनात्मक अऊ आध्यात्मिक होए के संगेच महान स्वतंत्रता संग्राम सेनानी घलोक रहिन। ओ मन ल भूदान आंदोलन के सेती जादा जाने जाथें। ओ मन जमीन मालिक मन ले दान के तौर म जमीन लेके गरीब मनखे मन ल खेती बर देवत रहिन। श्री बघेल ह कहिन संत भावे ह अपन जीवन गरीब अऊ पिछड़े वर्ग के मनखे मन के उत्थान म लगा दीन अऊ ओ मन ल आध्यात्मिक रूप ले जीवन म सही अऊ गलत के बीच के अंतर समझाइन। अइसन संत सेनानी के विचार मूल्य हमला सदा प्रेरित करत रइहीं।