गुरु घासीदास के अनुयायी मन के दल पावन गिरौदपुरी धाम बर होइन रवाना
पवित्र जैतखाम के पूजा-अर्चना अउ गुरु घासीदास बाबा के सुमिरन करके प्रदेशवासी मन के सुख-समृद्धि अउ खुसहाली के करिन कामना
रायपुर, मुख्यमंत्री श्री विष्णु देव साय ह आज राजधानी रायपुर के मोवा म स्थित सतनाम भवन परिसर ले “विशाल सतनाम सद्भाव पदयात्रा” के सुभारंभ करिन। ओमन धार्मिक विधि-विधान के संग पदयात्रा ल हरियर झंडी देखा के पावन गिरौदपुरी धाम बर रवाना करिन। ए मौका म मुख्यमंत्री ह पवित्र जैतखाम के पूजा-अर्चना करिन अउ गुरु घासीदास बाबा के पुन सुमरन करत हुए प्रदेशवासी मन के सुख-समृद्धि अउ खुसहाली के कामना करिन।
मुख्यमंत्री श्री साय ह पदयात्रा म सामिल सरधालु मन अउ समाज के भाई-बहिनी मन संग गोठ-बात करत हुए कहिन के गुरु घासीदास बाबा के “मनखे-मनखे एक समान” के संदेस ह जम्मो मनखे समाज बर प्रेरणा के सोत आय। ओमन बिसवास जताइन के ए पदयात्रा ह समाज म सद्भावना, समरसता अउ भाईचारा ल अउ मजबूत करही। श्री साय ह कहिन के राज्य सरकार समाज के सबो डाहर ले विकास बर संकल्पित हे अउ सामाजिक हित मन ल आगू बढ़ाए बर बिसेस प्राधिकरण के गठन घलो करे गे हे। पदयात्रा के बाद बड़े मेला के आयोजन के जानकारी घलो ओमन ह दीन।
कैबिनेट मंत्री गुरु खुशवंत साहेब ह कहिन के ए पदयात्रा ह सामाजिक समरसता, मनखे मन के कल्याण अउ एकता के उदेस ले आयोजित करे जात हे। ओमन सबो झन ले सामाजिक भेदभाव अउ इरिसा-जलन ले ऊपर उठ के राष्ट्र प्रथम के भावना संग आगू बढ़े के नेवता दीन। ओमन ल भरोसा हे के ए यात्रा ह गुरु घासीदास बाबा के संदेस ल जन-जन तक पहुँचाही।
कार्यक्रम म धर्मगुरु गुरु श्री बालदास साहेब, विधायक श्री ललित चंद्राकर, विधायक श्री मोतीलाल साहू, फिल्म विकास निगम के अध्यक्ष सुश्री मोना सेन, छत्तीसगढ़ रजककार विकास बोर्ड के अध्यक्ष श्री प्रहलाद रजक, जिला पंचायत अध्यक्ष श्री नवीन अग्रवाल, संत समाज के प्रतिनिधि अउ जम्मो समाज के सियान मन उपस्थित रहिन।
बता दन के रायपुर ले गिरौदपुरी धाम तक होवइया “विशाल सतनाम सद्भाव पदयात्रा” के आयोजन 18 ले 22 फरवरी 2026 तक करे जाही। पदयात्रा के उदेस सामाजिक समरसता, आपसी भाईचारा अउ सद्भाव के संदेस ल मनखे-मनखे तक पहुँचाना आय। ए दौरान गिरौदपुरी धाम मेला म अलग-अलग सामाजिक, सांस्कृतिक अउ धार्मिक कार्यक्रम मन के आयोजन करे जाही।
