होली के पहिली किसान मन ला मिलही 10 हजार करोड़ रूपिया ले जादा के धान के अंतर के राशि
मुख्यमंत्री ला धान ले तौल के प्रदेश के अन्नदाता मन जताइन आभार
मुख्यमंत्री के अध्यक्षता म 28 फरवरी के बिलासपुर जिला म होही राज्य स्तरीय राशि अंतरण कार्यक्रम
रायपुर, मुख्यमंत्री श्री विष्णु देव साय ह कहिन के अन्नदाता मन देस के अर्थव्यवस्था के मजबूत रीढ़ हरें अउ किसान मन के समृद्धि अउ खुशियाली ले ही विकसित भारत के सपना साकार होही। मुख्यमंत्री ले आज उंकर निवास कार्यालय म प्रदेश के किसान मन ह सौजन्य मुलाकात करिन अउ ‘कृषक उन्नति योजना’ के माध्यम ले धान के अंतर के 10 हजार करोड़ रूपिया ले जादा के राशि ला होली के पहिली किसान मन के खाता म डारे के घोषणा बर आभार जताइन। ए मउका म किसान मन ह मुख्यमंत्री ला धान ले तौल के प्रदेश के अन्नदाता मन कोति ले अभिनंदन करिन।
मुख्यमंत्री श्री साय ह कहिन के प्रधानमंत्री श्री नरेंद्र मोदी ह हर समे किसान मन के चिंता करथो अउ उंखर आय बढ़ाए बर सरलग काम करत हें। उमन कहिन के भारत एक कृषि प्रधान देस आय अउ किसान मन के उन्नति ही रास्ट्र के प्रगति के आधार आय। उमन कहिन के अटल जी के बखत म किसान मन ला सशक्त बनाए बर ‘किसान क्रेडिट कार्ड’ (केसीसी) जइसे जरूरी व्यवस्था लागू करे गए हे, जेकर ले किसान मन ला कम ब्याज दर म करजा मिले बर धरिस। एकर पहिली किसान मन ला महाजन मन ले जादा ब्याज म करजा लेबर परत रहिस, जेकर ले उमन आर्थिक सोसन के सिकार होवत रहिन। मुख्यमंत्री ह कहिन के अब किसान मन ला बिना ब्याज के पूंजी के सुबिधा मिलत हे। उमन कहिन के प्रधानमंत्री सिंचाई योजना के माध्यम ले किसान मन के खेत तक पानी पहुंचत हे अउ प्रदेश म सिंचाई के रकबा ह सरलग बाढ़त हे।
मुख्यमंत्री श्री साय ह कहिन के राज्य सरकार ह किसान मन ले प्रति एकड़ 21 क्विंटल धान ला 3100 रूपिया प्रति क्विंटल के दर ले खरीदत हे, जेन देस म सबले जादा हे। उमन कहिन के सरकार ह निर्णय लेहे हे के धान के अंतर के लगभग 10 हजार करोड़ रूपिया ले जादा के राशि ला होली के पहिली किसान मन के खाता म भेज देहे जाही। 28 फरवरी के बिलासपुर जिला ले ए राशि के अंतरण करे जाही अउ पूरा प्रदेश के विकासखंड मन फेर एला तिहार कस मनाए जाही। मुख्यमंत्री ह बताइन के ए बछर 25 लाख 24 हजार किसान मन ले 141 लाख मीट्रिक टन धान के खरीदी करे गए हे। उमन बिसवास देवाइन के राज्य सरकार ह आगू घलो किसान मन के हित म मिहनत अउ लगन के संग काम करत रइही।
ए मउका म छत्तीसगढ़ राज्य बीज विकास निगम के अध्यक्ष श्री चंद्रहास चंद्राकर संग प्रदेश भर ले आए किसान मन उपस्थित रहिन।
