मुख्यमंत्री श्री विष्णु देव साय ह सिटी गैस अवसंरचना के करिन सुभारंभ
हरित छत्तीसगढ़, स्मार्ट छत्तीसगढ़ के कोति म बड़े कदम
मेट्रो सहर मन के कस डोमेस्टिक पाइप्ड नेचुरल गैस के माध्यम ले घर अउ व्यावसायिक संस्थान मन ला मिलही गैस
रायपुर, मुख्यमंत्री श्री विष्णु देव साय ह आज राजधानी रायपुर के एक निजी होटल म सिटी गैस अवसंरचना परियोजना के सुभारंभ करिन। ए मउका म उमन सीएनजी ले लैस गाड़ी मन ला हरियर झंडी देखा के रवाना करिन अउ रायपुर नगर निगम के पहिली पाइपलाइन गैस उपभोक्ता श्रीमती पूनम चौबे ले गोठ-बात करिन अउ घर म पाइपलाइन गैस के सुबिधा के बारे म जानकारी लीन।
मुख्यमंत्री ह कहिन के छत्तीसगढ़ अपन बने के 25 बछर पूरा करके रजत जयंती बछर मनावत हे अउ ए बछर मन म प्रदेश ह विकास के कतको नवा आयाम स्थापित करे हे। सिटी गैस अवसंरचना परियोजना ए विकास जात्रा म एक नवा उपलब्धि आय। उमन कहिन के ए पहल सिरिफ नवा सुबिधा नोहे, बल्कि स्वच्छ ऊर्जा, पर्यावरण संरक्षण अउ आधुनिक अधोसंरचना कोति प्रदेश के सशक्त संकल्प आय।
मुख्यमंत्री ह बताइन के अब मेट्रो सहर मन के तर्ज म डीपीएनजी (डोमेस्टिक पाइप्ड नेचुरल गैस) के माध्यम ले घर अउ व्यावसायिक संस्थान मन ला पाइपलाइन ले गैस उपलब्ध होही। एकर ले घर के उपभोक्ता मन ला रिफिलिंग के झंझट ले मुकती मिलही अउ सुरक्षा घलो बाढ़ही। उमन कहिन के सस्ता अउ सुलभ ऊर्जा मिले ले उद्योग क्षेत्र ला घलो गति मिलही अउ प्रदेश म निवेश के संभावना मन सशक्त होही।
मुख्यमंत्री ह एचसीजी समूह ला बधाई देवत ए आसा जताइन के उमन रायपुर संग बलौदाबाजार अउ गरियाबंद जिला म जल्दीच सीएनजी स्टेशन मन के बड़े नेटवर्क तैयार करहीं। उमन कहिन के गाड़ी मन म सीएनजी के उपयोग ले प्रदूषण म कमी आही अउ आम नागरिक मन के ईंधन के खरचा म घलो राहत मिलही।
मुख्यमंत्री ह कहिन के हाले म आए राज्य बजट म अधोसंरचना विकास बर जरूरी प्रावधान करे गए हे। सरकार के लक्छ हे के सहर ले लेके गांव तक दुनिया भर के सुबिधा उपलब्ध होवय अउ प्रदेश के मनखे मन ला मेट्रो सहर मन जइसे सुबिधा के अनुभव होवय। उमन कहिन के विकास अउ पर्यावरण संरक्षण संगे-संग चलय, ए कोति म सरकार ग्रीन एनर्जी ला प्राथमिकता देवत हे। उमन प्रदेश के मनखे मन ले अपील करिन के उमन स्वच्छ ईंधन अपनाके पर्यावरण संरक्षण म भागीदार बनंय अउ हरित, विकसित अउ आत्मनिर्भर छत्तीसगढ़ के निर्माण म अपन योगदान देवंय।
बता दन के सिटी गैस अवसंरचना परियोजना रायपुर, बलौदाबाजार अउ गरियाबंद जिला मन म सुरु करे गए हे। एकर माध्यम ले घरेलू उपयोग अउ व्यावसायिक संस्थान मन बर पाइपलाइन ले पीएनजी के आपूर्ति करे जाही अउ गाड़ी मन बर सीएनजी घलो मिलही। कार्यक्रम म एचसीजी समूह के प्रबंध निदेशक श्री राहुल चोपड़ा, निदेशक श्री राजीव माथुर, अध्यक्ष श्री दीपक सावंत, श्री राकेश रंजन, गेल इंडिया के प्रतिनिधि अउ उद्योग जगत के मनखे उपस्थित रिन।