अरपा महोत्सव मा 100 करोड़ रूपया के विकास काम मन के मिलीस सौगात
मुख्यमंत्री बस सेवा योजना मा शामिल करे के संग अउ कतको घोषणा करिन
300 नवा बिहाता जोड़ा मन ला दीन असीस
जीपीएम, मुख्यमंत्री श्री विष्णुदेव साय ह अरपा महोत्सव अउ गौरेला पेंड्रा मरवाही जिला के छठवां स्थापना दिवस समारोह के मऊका मा जिला ला लगभग 100 करोड़ के विकास काम मन के सौगात दीन। उमन कहिन के जिला के समन्वित विकास बर हर संभव कोसिस करे जाही। मुख्यमंत्री ह ए मऊका मा मुख्यमंत्री बस सेवा योजना मा जिला ला शामिल करे के संग अउ कइ ठन घोषणा करिन। उमन कार्यक्रम मा मुख्यमंत्री कन्या विवाह योजना के तहत 300 नवा बिहाता जोड़ा मन ला सुखी दाम्पत्य जीवन के असीस दीन।
मुख्यमंत्री श्री विष्णुदेव साय ह अरपा महोत्सव के बधाई देवत कहिन के 100 करोड़ ले जादा के विकास काम मन के लोकार्पण अउ भूमिपूजन ले जिला के विकास ला गति मिलही। उमन कहिन के पेंड्रारोड ले अमरकंटक तक 19 किलोमीटर सड़क बने ले आवाजाही मा सुविधा होही अउ केवची मारग के बने ले पर्यटन विकास ला नवा दिसा मिलही। मुख्यमंत्री ह कहिन के आज पूरा प्रदेश मा 6 हजार 414 जोड़ा मन के बिहाव होय हे, जेकर ले एहा एक ऐतिहासिक बखत बन गे हे अउ एला गोल्डन बुक ऑफ वर्ल्ड रिकॉर्ड मा जगा मिलीस हे। उमन कहिन के मुख्यमंत्री कन्या विवाह योजना नोनी मन के सम्मान अउ ओकर मन के भविष्य ला सुरक्षित करे बर एक जरूरी योजना आय।
मुख्यमंत्री श्री साय ह ए मऊका मा नगर पंचायत मरवाही मा उच्च विश्राम गृह के मंजूरी, मुख्यमंत्री बस सेवा योजना मा जीपीएम जिला ला शामिल करे, जिला मुख्यालय मा बड़का ऑडिटोरियम के निर्माण अउ समदलई पर्यटन जगा मा स्टॉप डैम बनाए के घोषणा करीन। कार्यक्रम मा अलग-अलग योजना के हितग्राही मन ला चेक अउ सामान बांटे के संगेच स्वामित्व योजना के तहत 435 किसान मन ला पट्टा प्रदान करे गीस। कार्यक्रम मा जनकलियाणकारी योजना मन ले जुड़े जतको स्टाल लगे रहिस, ओकर मुख्यमंत्री ह अवलोकन करिन।
कार्यक्रम मा मुख्यमंत्री श्री साय ह जिला के विकास काम मन ऊपर अधारित बुकलेट के विमोचन घलो करिन। एखर संगेच कार्यक्रम मा जिला के पर्यटन के संभावना अउ जिला के दू बछर के विकास यात्रा ऊपर बने वीडियो फिल्म घलो देखाय गीस। ए मऊका मा महिला अउ बाल विकास मंत्री श्रीमती लक्ष्मी राजवाड़े, विधायक मन सर्वश्री प्रणव कुमार मरपच्ची, अटल श्रीवास्तव, अनुज शर्मा, मोतीलाल साहू, जिला पंचायत अध्यक्ष श्रीमती समीरा पैकरा अउ आन जनप्रतिनिधि, अधिकारी अउ भारी संख्या मा मनखे मन उपस्थित रहिन।