किसान मन के तरक्की ले ही आगू बढ़ही छत्तीसगढ़: मुख्यमंत्री विष्णु देव साय

रायपुर, हरेली तिहार के सुघ्घर बेरा मा मुख्यमंत्री विष्णु देव साय ह नवा रायपुर मा राजस्व मंत्री टंकराम वर्मा के नवा शासकीय आवास के गृह प्रवेश अउ हरेली कार्यक्रम मा सामिल होइन। ए बेरा मा मुख्यमंत्री ह राजस्व मंत्री अउ ओकर परिवार ल नवा घर के बधाई दीन अउ सब्बो ल हरेली के शुभकामना दीन। ए कार्यक्रम मा विधानसभा अध्यक्ष डॉ. रमन सिंह घलो खास रूप ले मौजूद रहिन।
कार्यक्रम ल संबोधित करत मुख्यमंत्री ह कहिन के किसान ह छत्तीसगढ़ के तरक्की के रीढ़ आय अउ उंकर मन के समृद्धि मा ही प्रदेश के विकास छिपे हे। सरकार ह किसान मन के आय बढ़ाए बर लगातार काम करत हे। प्रदेश मा 3,100 रुपिया प्रति क्विंटल के दर ले प्रति एकड़ 21 क्विंटल धान बिसाए जात हे, जेखर से ग्रामीण अर्थव्यवस्था ल मजबूती मिले हे। एखर सेगेच सिंचाई के सुविधा बढ़ाए अउ किसान मन ल आधुनिक खेती व अउ आय बढ़ाए वाले काम मन ले जोड़े बर डबल इंजन सरकार सरलग उदीम करत हे।
विधानसभा अध्यक्ष डॉ. रमन सिंह ह प्रदेशवासी मन ल हरेली के बधाई देत कहिन के हरेली ले ही छत्तीसगढ़ के तिहार के सुरुवात होथे। ए साल सुघ्घर पानी गिरे ले किसानमन मा उत्साह हे अउ बने फसल के आस हे। ए कार्यक्रम मा राजस्व मंत्री टंकराम वर्मा ह राम भजन घलो गाइस, जेखर ले माहौल भक्तिमय होगे। ए बेरा मा कई मंत्री, विधायक अउ गणमान्य नागरिकमन मौजूद रहिन।