मुख्यमंत्री ह झुमका जलाशय म बोटिंग अउ वाटर स्पोर्ट सुविधा मन के देख-रेख करिन, ओपन थिएटर के करिन लोकार्पण
कोरिया, मुख्यमंत्री श्री विष्णुदेव साय ह कोरिया प्रवास के बखत पंचायत अउ ग्रामीण विकास विभाग कोति ले बैकुंठपुर म बने नामी झुमका पर्यटन स्थल म ओपन थिएटर के लोकार्पण करिन। ए मउका म ओमन झुमका जलाशय म बोटिंग करत क्षेत्र के सुग्घर प्राकृतिक सुघराई के आनंद लीन अउ इहाँ तइयार करे गय पर्यटन सुविधा मन के अवलोकन करिन।
मुख्यमंत्री श्री साय ह झुमका जलाशय म शिकारा म बइठ के नउका विहार करिन। चारों मुड़ा हरियाली, सांत जलराशि अउ कँवल फूल ले सजे ए सुग्घर जगा अब एक बढ़िया पिकनिक स्पॉट के रूप म आगू आवत हे। मुख्यमंत्री ह इहाँ बोटिंग, वाटर स्पोर्ट्स संग बढ़ाय गए पर्यटन काम-काज के जानकारी लीन अउ बेवस्था मन के सराहना करिन।
ए मउका म मुख्यमंत्री श्री साय ह लगभग 27 लाख रुपया के लागत ले बने ओपन थिएटर के लोकार्पण करिन। 500 दर्शक मन के बइठे के छमता वाला ए ओपन थिएटर सांस्कृतिक आयोजन मन बर नवा केंद्र बनही।
मुख्यमंत्री श्री विष्णु देव साय ह कहिन के झुमका जलाशय सिरिफ कोरिया जिला के चिन्हारी नोहे, बल्कि पूरा छत्तीसगढ़ म पर्यटन के अगाध संभावना के चिनहारी आय। ओमन कहिन के राज्य सरकार पर्यटन ठउर मन के विकास, सुघराई अउ आधुनिक सुविधा मन के विस्तार बर सरलग काम करत हे, ताकि छत्तीसगढ़ ला देस के प्रमुख पर्यटन ठउर मन म स्थापित करे जा सकय। मुख्यमंत्री ह अधिकारी मन ला निरदेस दीन के पर्यटक मन के सुरक्षा, सफ़ाई अउ सुविधा मन के खास धियान रखे जाय अउ स्थानीय युवा मन ला पर्यटन के काम ले जोड़ के रोजगार के अउसर देवाय जाय।
ए मउका म कृषि मंत्री श्री रामविचार नेताम, स्वास्थ्य मंत्री श्री श्याम बिहारी जायसवाल, विधायक श्री भैयालाल राजवाड़े, संभागायुक्त श्री नरेंद्र दुग्गा, आईजी श्री दीपक झा, कलेक्टर श्रीमती चंदन त्रिपाठी, पुलिस अधीक्षक श्री रवि कुमार कुर्रे संग जनप्रतिनिधि, अधिकारी अउ भारी संख्या म गणमान्य नागरिक मन उपस्थित रहिन।