रायपुर, मुख्यमंत्री श्री विष्णु देव साय ह काली मुख्यमंत्री निवास कार्यालय म सुसासन तिहार 2026 के अंतर्गत बालोद अउ मोहला-मानपुर-अंबागढ़ चौकी जिला मन म चलत बिकास के बूता अउ जनकलयानकारी योजना मन के समीक्छा करिन। समीक्छा बइठक म कलक्टर मन, पुलिस अधीक्षक मन अउ बड़का हाकिम मन के संग राजस्व मामला, गांव अउ सहर के बिकास, खेती-किसानी, सुघर सेहत, सिक्छा, कानून-बियबस्था अउ अलग-अलग बिभाग के योजना मन के आघू बढ़े के हाल-चाल के पूरा जाच-परख करे गीस।
मुख्यमंत्री श्री विष्णुदेव साय ह कहिन के सुसासन तिहार सिरिफ एकठो प्रसासनिक अभिआन नोहे, भलुक सासन अउ जनता के बीच बिसवास ला मज्बूत करे के माधियम आय। उमन बताइन के ए अभिआन के तहत उमन जनसमसिया निवारण सिबिर अउ चौपाल मन के माधियम ले सीधा लोगन मन ले गोठ-बात करिन, ओमन के दुख-पिरित ला सुनिन अउ योजना मन के जमीनी हकीकत के जायजा लीन। ओमन कहिन के तपत घाम के बादो प्रसासन के अमला ह मनखे मन के समसिया के समाधान बर लगन के संग बूता करे हे अउ ए निसठा ला आघू घलो बनाय रखना परही।
मुख्यमंत्री श्री साय ह कहिन के सुसासन के असली उददेस नागरिक मन के समसिया मन के समय म, साफ-सुथरा अउ संवेदनसील तरीका ले निपटारा करे ला पक्का करना आय। ओमन हाकिम मन ला सकारात्मक सोच, जवाबदेही अउ जनसेवा के भावना के संग बूता करे के सलाह देत कहिन के सासन के कोनो योजना के हकदार मनखे लाभ ले बंचित झन रहे ए बात के धियन रखव।
बइठक म मुख्यमंत्री के प्रमुख सचिव श्री सुबोध कुमार सिंह, मुख्यमंत्री के सचिव श्री राहुल भगत, मुख्यमंत्री के विशेष सचिव श्री रजत बंसल, मुख्यमंत्री के संयुक्त सचिव श्री प्रभात मलिक, दुर्ग संभाग के कमिश्नर श्री एस.एन. राठौर, दुर्ग अउ राजनांदगांव रेंज के आईजी, बालोद तथा मोहला-मानपुर-अंबागढ़ चौकी जिला के कलेक्टर अउ पुलिस अधीक्षक सहित बड़का हाकिम मन वर्चुअल माधियम ले जुड़े रहिन।
सकारात्मक सोच, जवाबदेही अउ संवेदनसील प्रसासन ले आखिरी मनखे तक चहुंचय सासन के योजना मन के लाभ : मुख्यमंत्री श्री विष्णु देव साय
