श्रद्धा अउ आस्था के प्रमुख केंद्र हे बाबा धाम: मुख्यमंत्री श्री विष्णु देव साय

रायगढ़, महाशिवरात्रि के पावन बेरा म मुख्यमंत्री श्री विष्णु देव साय ह अपन धरमपत्नी श्रीमती कौशल्या साय के संग रायगढ़ प्रवास के बखत रात के एक बजे कोसमनारा स्थित श्री श्री 108 श्री सत्यनारायण बाबा धाम पहुँचिन। उमन भगवान भोलेनाथ अउ सत्यनारायण बाबा के बिधिवत पूजा-अर्चना करिन अउ प्रदेस के मनखे मन बर सुख-समृद्धि अउ खुसहाली के कामना करिन। ए मौका म मुख्यमंत्री ह जम्मो प्रदेसवासी मन ला महाशिवरात्रि तिहार के बधाई अउ सुभकामना दीन।
मुख्यमंत्री ह जिला खनिज नियास (DMF) मद ले 1 करोड़ 20 लाख रुपिया के लागत ले अलग-अलग बिकास काम मन के सिलानियास तको करिन। ए काम मन म मुख्य भवन के आगू ग्रेनाइट फरस, सेड निरमाण, शौचालय अउ पार्किंग बर सीसी रोड के काम सामिल हे। मुख्यमंत्री ह कहिन के कोसमनारा धाम ह श्रद्धा के बड़े केंद्र आय, इहाँ के आध्यात्मिक उरजा समाज ला सही रद्दा देखाथे।
जानबा हे के रायगढ़ ले 7 किलोमीटर दूरिहा ए धाम म बबा ह साल 1998 ले कठोर तपसिया करत हें। साल 2003 म ओमला ‘श्री श्री 108’ के उपाधि मिलिस। बाबा ह पथरा मन ला बटोर के खुद ले शिवलिंग बनाइन अउ उही ला अपन तपोभूमि मान के गरमी, बरसात अउ जाड़ म खुले अगास के नीचे साधना करथें। ए कार्यक्रम म महापौर श्री जीवर्धन चौहान, कलेक्टर, एसपी अउ भारी संख्या म सरद्धालु मन उपस्थित रहिन।