रायपुर, 07 जून 2024। स्वास्थ्य मंत्री श्री श्याम बिहारी जायसवाल ह आज मंत्रालय म स्वास्थय विभाग के अधिकारी मन के संग मैराथन बैठक लेके विभाग के कामकाज के समीक्षा करिन। श्री जायसवाल ह कहिन कि मुख्यमंत्री श्री विष्णुदेव के सियानी म स्वास्थ्य सुविधा मन म सरलग इजाफा करे जात हे अऊ सबो मेडिकल कालेज अउ जिला अस्पताल मन म स्वास्थ्य सुविधा बढ़ाय उपर जोर देहे जात हे। श्री जायसवाल ह अधिकारी मन ल कहिन के विष्णु के सुशासन म ओ मन ल रिपोट न ही भलुक रिजल्ट चाही ताकि राज्य के जनता ल बेहतर स्वास्थ्य सुविधा सरलग मिलत रहय।
श्री जायसवाल ह कहिन कि राज्य मे स्वास्थ्य सुविधा मन म विस्तार बर ये जरूरी नइ हे कि बजट के उपलब्धता रहय, बल्कि जरूरी ये हे कि मजबूत इच्छाशक्ति होवय, हमला अइसन काम करना हे जेखर से मनखे मन के मन म स्वास्थ्य सुविधा ल लेके सकारात्मक भाव आवय।
मलेरिया अऊ सिकल सेल एनीमिया के रोकथाम बर स्थानीय स्तर म जागरूकता के जरूरत- स्वास्थ्य मंत्री ह मलेरिया अऊ सिकल सेल एनीमिया जइसे बीमारी मन के बारे म बात करत कहिन के एला लेके समाज म जागरूकता लाय के जरूरत हे। एखर बर जेन क्षेत्र मन म ए बीमारी मन के संक्रेंद्रण जादा हे उहां जादा ले जादा प्रचार प्रसार करके मनखे मन ल एखर से बाचे के तरीकाामन के बारे म जागरूक करे जाए। स्वास्थ्य मंत्री श्री श्याम बिहारी जायसवाल ह समीक्षा बैठक म विभागीय बजट के आंकलन करत ओला अनुपूरक बजट म सामिल करे के प्रस्ताव उपर विस्तार पूर्वक चर्चा करिन एखर संगेच सरलग बजट म पारित काम मन के घलोक समीक्षा करिन श्री जायसवास ह विभागीय समीक्षा बैठक म चिकित्सक अउ निचले स्टाफ के पदस्थापना ल लेके चर्चा करिन अऊ खाली पद ल जल्द से जल्द व्यापम अउ पीएससी के माध्यम ले भरे के निर्देश दीन।
सुपेबेड़ा म डायलिसिस सेंटर, राज्य म माडल नेफ्रोलाजी सेंटर खोले के अनुशंसा- स्वास्थ्य मंत्री ह सुपेबेड़ा म किडनी के बीमारी ल ध्यान मे रखत एहां एक अत्याधुनिक डायलिसिस सेंटर खोले के अनुशंसा करे हें। सुपेबेड़ा म बीमार मनखे मन ल बेहतर स्वास्थ्य सुविधा देहे अऊ बीमारी के कारण के पता लगाय बर एक कमेटी घलोक बनाय गए हे। बैठक म स्वास्थ्य मंत्री ह सुपेबेड़ा म उत्कृष्ट डायलिसिस सेंटर खोले के अनुशसा करे हे ताकि उहां के मरीज मन ल जल्दी लाभ मिल सकय। एखर संगेच श्री जायसवाल ह राज्य भर के किडनी के मरीज मन के बेहतर इलाज बर राज्य म एक माडल नेफ्रोलाजी सेंटर खोले के घलोक अनुशंसा करे हें।
एनीमिया के दवइ मन के सैंपल के करव रैंडम जांचः श्री जायसवाल
राज्य के अस्पताल मन म दवइ मन के उपलब्धता के बारे म चर्चा करत श्री श्याम बिहारी जायसवाल ह अधिकारी मन ल निर्देश जारी करे हे। दवइ मन के उपलब्धता सुनिश्चित करे के संग श्री जायसवाल ह विभाग ल निर्देशित करे हे कि एनीमिया के बीमारी ल ठीक करे बर उपलब्ध दवइ मन के सैंपल के अलग-अलग लेबोरेट्री म रैंडम जांच करे जाय ताकि ए जरूरी दवा के गुणवत्ता ल जांचे परखे जा सकय।
समीक्षा बैठक म अपर मुख्य सचिव श्री मनोज पिंगुआ, स्वास्थ्य विभाग के विशेष सचिव श्री चंदन कुमार, एनएचएम के एमडी श्री जगदीश सोनकर, आयुक्त सह संचालक श्री ऋतुराज रघुवंशी, नियंत्रक खाद्य अउ औषधि विभाग श्री कुलदीप शर्मा, संचालक आयुष सुश्री इफ्फत आरा, सीजीएमएससी एमडी सुश्री पद्मिनी भोई साहू समेत विभाग के वरिष्ठ अधिकारी उपस्थित रहिन।
