रायपुर, बाबा गुरु घासीदास के बताय सत, समता अउ मनखे-मनखे एक समान के रद्दा म चलके ही छत्तीसगढ़ ला विकसित राज बनाय जा सकथे। मुख्यमंत्री श्री विष्णु देव साय ह मुंगेली जिला के लालपुर म आयोजित तीन दिन के मेला अउ जयंती कार्यक्रम म ए बात ला कहिन। मुख्यमंत्री ह लालपुर धाम म बाबा गुरु घासीदास मंदिर अउ जैतखाम के पूजा-अर्चना करिन अउ परदेस के खुसहाली बर असीरबाद मांगिन।
लालपुर ला मिलिस नवा कॉलेज अउ विकास के सौगात
ए मऊका म मुख्यमंत्री ह लालपुर म नवा महाविद्यालय (कॉलेज) खोले के घोषणा करिन। संग म मेला बर मिलइया सहायता रासि ला 10 लाख ले बढ़ाके 15 लाख करे के घेषणा तको करिन। कार्यक्रम स्थल म प्रवेश दुवार बर 25 लाख अउ मुंगेली सतनाम भवन के मरम्मत बर घलो 25 लाख रुपये दे के गोठ कहिन।
सरकार के बड़े काम अउ किसान मन बर भरोसा
मुख्यमंत्री ह कहिन कि सरकार के दू बछर म मोदी जी के गारंटी ला पूरा करे जात हे। अब तक 18 लाख आवास के मंजूरी दे जा चुके हे। उमन भरोसा देवाईन के सरकार हर पात्र किसान ले धान खरीदे बर संकल्पित हे। धान के रकबा अउ किसान मन के संख्या घलो बाढ़े हे। महतारी वंदन योजना ले 70 लाख नोनी-बऊ मन ला फायदा मिलत हे। अनुसूचित जाति प्राधिकरण के बजट ला घलो 50 करोड़ ले बढ़ाके 75 करोड़ कर देहे गे हे।
ए कार्यक्रम म उप मुख्यमंत्री श्री अरुण साव, मंत्री श्री गुरु खुशवंत साहेब, खाद्य मंत्री श्री दयालदास बघेल अउ भारी संख्या म समाज के मनखे मन उपस्थित रहिन।
