मुख्यमंत्री श्री साय ह प्रधानमंत्री श्री मोदी के प्रवास के तैयारी मन के लीन परखर जायज़ा सबो तियारी बेरा म पूरा करे खातिर अधिकारी मन ल दीन निर्देश
रायपुर, प्रधानमंत्री श्री नरेंद्र मोदी के अवइया छत्तीसगढ़ प्रवास ल देखत मुख्यमंत्री श्री विष्णु देव साय ह आज नवा रायपुर म कई ठन कार्यक्रम स्थल मन के जांच करके तियारी मन के विस्तृत समीक्षा करिन। मुख्यमंत्री श्री साय ह कहिन के प्रधानमंत्री श्री नरेंद्र मोदी जी के छत्तीसगढ़ आगमन राज्य खातिर गरब के बेरा ये। उमन अधिकारी मन ले कहिन के ए बेरा म हरेक व्यवस्था उत्कृष्टता के चिनहारी बनय अऊ प्रदेश के संस्कृति, आत्मगौरव अऊ प्रगति के झलक हर स्थल म दिखय।
मुख्यमंत्री श्री साय ह कई ठन जगा मनके करिन निरीक्षण
मुख्यमंत्री श्री साय ह सबले पहिली नवा रायपुर स्थित श्री सत्य साईं हॉस्पिटल के निरीक्षण करिन। उमन कार्यक्रम के रूपरेखा, सभागार व्यवस्था, मंच अऊ आमंत्रित अतिथि मनके बइठे के व्यवस्था के जायजा लीन।
एखर पाछू मुख्यमंत्री श्री साय प्रजापिता ब्रह्मकुमारी ध्यान केंद्र पहुँचिन, जिहां उमन प्रधानमंत्री के प्रस्तावित कार्यक्रम के बिंदुवार समीक्षा करिन। उमन ध्यान केंद्र के सभागार, मेडिटेशन रूम अऊ बाहरी परिसर के निरीक्षण करत सबो व्यवस्था मनल समय म पूरा करे के निर्देश दीन।
ट्राइबल म्यूज़ियम बनही जनजातीय अस्मिता के अमर चिनहारी
मुख्यमंत्री श्री साय ह शहीद वीर नारायण सिंह स्मारक सह जनजातीय स्वतंत्रता संग्राम सेनानी संग्रहालय के निरीक्षण करिन। उमन कहिन के ये संग्रहालय जनजातीय समाज के वीरता, बलिदान अऊ अस्मिता के अमर चिनहारी बनही।मुख्यमंत्री ह निर्देश दीन के संग्रहालय के हर एक अनुभाग ल ए प्रकार तियार करे जाए के वो अवइया मन ल छत्तीसगढ़ के जनजातीय स्वतंत्रता संग्राम के गौरवशाली अध्याय ले गहराई ले परिचित करा सकय। उमन प्रदर्शनी दीर्घा, मल्टीमीडिया गैलरी, स्मृति कक्ष अऊ बाहरी परिसर के व्यवस्था मन के घलोक समीक्षा करिन।
राज्योत्सव स्थल बनही छत्तीसगढ़ के उपलब्धि मनके अयना
मुख्यमंत्री श्री साय ह नवा रायपुर स्थित राज्योत्सव स्थल के घलोक दौरा करिन अऊ तियारी मन के जानकारी लीन। उमन मुख्य मंच, पार्किंग क्षेत्र, विभागीय डोम, प्रदर्शनी ओसारी, वीआईपी ओसारी अऊ आमजनता खातिर बनाय गए रद्दा मन के जांच करिन। उमन कहिन के राज्योत्सव छत्तीसगढ़ के उपलब्धि, संस्कृति अऊ आत्मविश्वास के उत्सव ये, ते पाए के ये आयोजन उत्कृष्टता के नवा मिसाल बनय।
मुख्यमंत्री श्री साय ह अधिकारी मन ल निर्देश दीन के सबो काम निरधारित समय-सीमा के भीतर पूरा करे जाए अऊ सुरक्षा, स्वच्छता अऊ आमजनता के सुविधा ले जुड़े सबो बिंदु मन म विशेष ध्यान देहे जाय।
ए बेरा म वन मंत्री श्री केदार कश्यप, मुख्य सचिव श्री विकास शील, मुख्यमंत्री के प्रमुख सचिव श्री सुबोध सिंह, प्रमुख सचिव श्री सोनमणि बोरा, पुलिस महानिदेशक श्री अरुण देव गौतम, सचिव श्री राहुल भगत संग कई ठन विभाग मन के वरिष्ठ अधिकारी मन उपस्थित रहिन।
