शासन के एक संवेदनशील पहल ले दृष्टिबाधित ज्योति के जीवन म आइस बदलाव

राजनांदगांव, एक कोसिस अइसे के जेखर से कोनो के जीवन म बदलाव आ जाय। दृष्टिबाधित श्रीमती ज्योति वर्मा ल शासन कोति ले डेजी प्लेयर मिले ले वोला अड़बड़ खुशी होइस हे। दिव्यांगजन के प्रति शासन के संवेदनशील पहल ले सहायक उपकरण प्रदाय योजना के अंतर्गत ओ ल डेजी प्लेयर देहे गए हे। वो ह बताइस कि ओ ह बचपन ले ब्रेल लिपि ले पढ़त हे अऊ कमला कॉलेज ले बीए करत हे। ये डेजी प्लेयर खास प्रकार के हे, जेमां साफ्टवेयर हे जेन हुकुम देहे म अवाज के माध्यम ले जानकारी देथे। वो ह बताइस कि ये मा ओ ह सेंटिंग, रिकार्डिंग, रेडियो चलाना सीख गए हे। धीरे-धीरे एला ऑपरेट करना सीखत हे। ये डिवाईस पढ़ई बर बहुत उपयोगी हे। एखर से समय जाने के संग देश-दुनिया के बात के जानकारी घलोक मिलथे। एखर से किताब तको पढ़े जा सकत हे।
श्रीमती ज्योति ह बताइस कि दृष्टिबाधित हेलेन किलर उंखर प्रेरणा हे। देखे, सुनने अउ बोले के क्षमता ओमां नइ रहिस। दिव्यांगता के बावजूद उमन अपन दुनिया बदलीन। वो ह बताइस कि कम्प्यूटर म डीसीए के कोर्स पूरा हो गए हे अऊ टाईपिंग घलोक सीखत हे। आगू कम्प्यूटर ले संबंधित काम करना चाहथे। वोखर पति घलोक दृष्टिबाधित हे, उंखर 3 साल के बालक स्वस्थ हे। वो ह बताइस कि समाज कल्याण विभाग कोति ले मदद मिलीस। पढ़े बर राष्ट्रीय छात्रवृत्ति अऊ विवाह प्रोत्साहन योजना के तहत 50 हजार रूपिया के राशि मिले हे।