– समूह के महिला मन के सपना मन ल शासन के सुराजी गांव योजना ले मिलीस पंदोली
– महिला मन ह शासन ल मान-सम्मान अऊ मदद मिले खातिर दीन धन्यवाद
– वृंदावन रसोई हे कुछ खास
– गरमी के दिन म इहां माटी के थर्मस ले मिलत हे जूड़ पानी
– वृंदावन रसोई म चीला, भजिया, फरा, गुलगुला भजिया, बड़ा मुंगोड़ा संग जम्मो छत्तीसगढ़ी कलेवा हे
– आर्डर म समूह के महिला मन बनावत हें छत्तीसगढ़ी कलेवा
– समूह के महिला मन गुरू गोपी चंदन अऊ गोपीचंदन टिकिया पूजा बर करत हें निर्माण
– कुमकुम पैकेजिंग, अगरबत्ती निर्माण अऊ मशरूम उत्पादन के काम घलोक हे जारी
राजनांदगांव, मेहनतकश महिला मन ह एक सपना अपन आर्थिक सशक्तिकरण अऊ स्वावलंबन देखे रहिन। ऊंखर सपना ल पंदोली मिलीस शासन के सुराजी गांव योजना ले। जइसे- जइसे बेरा बीतत गीस, समूह के महिला मन के उदीम बाढ़त गीस। जिला प्रशासन के पंदोली ले गणेश गुलाल प्राईवेट लिमिटेड ले अनुबंध करके गुलाल, चंदन, कुमकुम, अगरबत्ती निर्माण के काम व्यापक पैमाना म उमन चालू करिन। वृंदावन गौठान के रूरल इंडस्ट्रियल पार्क म बदले के ये अजब कहिनी ये। 26 एकड़ म फइले ये गौठान प्रदेश के सबले बड़े गौठान ये।
वृंदावन रसोई हे कुछ खास –
तपत गरमी म इहां माटी के थर्मस के पानी जीव जुड़ा जाथे। छत्तीसगढ़ के मोहक संस्कृति ले सुसजित रसोई म ढेंकी, जांता, नांगर, कलारी, दतारी, हसियां, रापा, गैती, फावड़ा अऊ आन कलाकृति मन के झांकी हे। शहरवासी ग्रामीण परिवेश म बने इहां के चुकिया म मिले चाय के आनंद ले सकथें। आर्डर म समूह के महिला मन छत्तीसगढ़ी व्यंजन चीला, भजिया, फरा, गुलगुला भजिया, बड़ा, मुंगोड़ा बनावत हें। जय बाबा कुटी समूह के माधुरी, अनिता ह बताइस कि हमन जेवनल ल अइसे बनाथन कि इहां शहर के मनखे आके जनमदिन के पार्टी घलोक मना सकयं।
जयबाबा कुटी समूह के महिला मन गुरू गोपी चंदन अऊ गोपीचंदन टिकिया पूजा बर बनावत हें। श्री गणेश गुलाल प्राईवेट लिमिटेड ले अनुबंध करके इहां काम चालू करे गए हे। महिला मन पैकेजिंग के काम घलोक सफलतापूर्वक करत हें। समूह के श्रीमती लोकेश्वरी निर्मलकर ह बताइस कि इहां काम करे ले बहुत बदलाव आए हे अऊ घर के माली स्थिति म सुधार होए हे। काम बर भटकना नइ परय, गौठान म रहि के काम करे ले घर के खरचा बने सहिन ले चलत हे। उहें घर के जिम्मेदारी घलोक बने सहिन निभा पावत हन। जेखर से परिवार के मनखे मन खुश हें। वो ह कहिस कि भविष्य म कुछ अइसनहे काम करना चाहत हन जेखर से समूह के महिला मन के एक विशेष पहिचान बनय। कई महिला मन तो पहली पइत घर के चारदीवारी ले बाहिर निकलके काम करत हें। ये एक अलग अऊ अच्छा अनुभव हे उहें आर्थिक रूप ले मजबूत होए के खुशी घलोक हे।
घर के जिम्मेदारी घलोक अच्छी जइसन निभा पा रही हे। जेखर से परिवार के मनखे खुश हे
शासन कोति ले महिला मन ल मान-सम्मान अऊ मदद मिले हे। एखर बर उमन मुख्यमंत्री श्री भूपेश बघेल, जिला प्रशासन अऊ गणेश गुलाल प्राईवेट लिमिटेड ल धन्यवाद कहत हें। गौठान म ही कुमकुम, जीवन योति गजी के पैकेजिंग काम, अगरबत्ती निर्माण अऊ मशरूम उत्पादन के काम घलोक जारी हे। समूह के मेघा यादव ह कहिन कि इहां काम करे ले बहुत अच्छा महसूस होवत हे अऊ जीवन स्तर म सुधार आए हे। वोकर बताती ओ ह बैंक म राशि जमा करे लगे हे। उहें श्रीमती शांति साहू ह बताइस कि इहां ले मिले राशि ले वो ह अपन छोटे बेटा के शादी करे हे अऊ घर के खरचा बने सहिन ले चलत हे।
गौठान के दुसर कोति व्यापक पैमाना म पपीता के खेती करे जात हे। डबरी म मछरी पालन म रोहू, कतला, कोमलकार के 18 किलोग्राम बीज डारे गए हे। डक हाऊस म बतखपालन करे जात हे। 183 बैग करीबन 55 कुंटल वर्मी कम्पोस्ट के उत्पादन करे गए हे। सोलर हाऊस म चंदन के टिकिया अऊ गेंदा के फूल सुखावत हें। समूह के महिला मन बर आजीविका वर्क शेड के निर्माण करे गए हे। गौठान म साढ़े 10 एकड़ म आम, जाम, नीबू, नारियल, कटहल, मुनगा, काजू फलदार वृक्ष लगाए गए हे।
