गौठान मेला के उद्देश्य जनसामान्य ल गौठान अऊ उहां संचालित आर्थिक गतिविधि मन ले अवगत कराना : कलेक्टर

– वृंदावन गौठान रूरल इंडस्ट्रियल पार्क म गौठान मेला के होइस आयोजन
– गौठान मेला म नागरिक मन ह गौठान म संचालित होवत आर्थिक गतिविधि मन ल तीर ले जानिन
– वृंदावन गौठान रूरल इंडस्ट्रियल पार्क स्वसहायता समूह के महिला मन बर बनिस आर्थिक स्वावलंबन के केन्द्र
– रूरल इंडस्ट्रियल पार्क ले ग्रामीण अर्थव्यवस्था मजबूत होही अऊ रोजगार के अवसर विकसित होही
राजनांदगांव, जिला के राजनांदगांव विकासखंड के ग्राम अंजोरा स्थित वृंदावन गौठान ल प्रदेश म रूरल इंडस्ट्रियल पार्क के रूप म चिन्‍हें जात हे। करीबन 40 एकड़ क्षेत्र म फइले गौठान म स्वसहायता समूह के महिला मन औद्योगिक काम म संलग्न हो के उद्योग कोति रूख करत हें। जिला प्रशासन कोति ले गौठान ले मनखे मन ल जोडे बर जिला के सबो गौठान मन म गौठान मेला के आयोजन करे जात हे। इही कड़ी म आज अंजोरा स्थित वृंदावन आदर्श गौठान म गौठान मेला के आयोजन करे गीस। कलेक्टर श्री तारन प्रकाश सिन्हा ग्राम अंजोरा स्थित वृंदावन गौठान रूरल इंडस्ट्रियल पार्क के गौठान मेला म सामिल होइन। ये दौरान छत्तीसगढ़ युवा आयोग के अध्यक्ष श्री जितेन्द्र मुदलियार उपस्थित रहिन। उमन गौठान मेला म लगाए गए स्टॉल मन के अवलोकन करिन। संगेच गौठान म स्वसहायता समूह कोति ले संचालित वृंदावन रसोई म चाय पीन अऊ छत्तीसगढ़ी व्यंजन के सुवाद लीन। कलेक्टर श्री सिन्हा ह कहिन कि गौठान ल मनखे मन ले जोडे बर गौठान मेला के आयोजन करे जात हे। उमन कहिन कि वृंदावन गौठान रूरल इंडस्ट्रियल पार्क ये। इहां करीबन 100 महिला मन ल गुलाल संग आन सामान बनाए के प्रशिक्षण देहे गए हे। अब ये महिला मन उत्पाद तियार करत हें। एखर बर श्री गणेशा गुलाल इंडस्ट्री ले ओएमयू घलोक होय हे। उमन कहिन कि रूरल इंडस्ट्रियल पार्क ले ग्रामीण अर्थव्यवस्था ल मजबूत करना अऊ रोजगार के अवसर विकसित करना हे। संगेच गौठान महिला मन के आर्थिक स्वावलंबन के घलोक केन्द्र ये। उमन कहिन कि गौठान म मवेशि मन के ध्यान रखे जात हे। एखर संगें-संग महिला स्वसहायता समूह बर आर्थिक सशक्तिकरण के माध्यम हे। गौठान मेला के उद्देश्य जनसामान्य गौठान ले जुड़े अऊ इहां आके कई ठन गतिविधि मन ले अवगत होवयं। जेखर से आन क्षेत्र के महिला मन इहां के महिला मन के काम ल देखके प्रेरित होवयं।