व्यापारी मन के समस्या के समाधान बर राज्य सरकार हर संभव उदीम करही : श्री भूपेश बघेल
मुख्यमंत्री ह छत्तीसगढ़ चेंबर ऑफ कॉमर्स एंड इंडस्ट्रीज के 60 वें वार्षिक सम्मेलन ल सम्बोधित करिन
धमेन्द्र निर्मल के सार समाचार, मुख्यमंत्री श्री भूपेश बघेल ह कहिन कि राज्य सरकार व्यापारी मन के समस्या के समाधान बर हरसंभव उदीम करही। व्यापारी मन के सुविधा बर टैक्स प्रक्रिया के सरलीकरण जरुरी हे, जेकर ले व्यापार-व्यवसाय फरै-फूलै। उन मन कहिन कि टैैक्स सरलीकरण बर जरूरत परे म राज्य सरकार चेंबर ऑफ कॉमर्स के प्रतिनिधि मन संग बइठ के विचार-विमर्श घलो करही। मुख्यमंत्री ह ये घलो कहिन कि व्यापारी मन के सम्मान के संगे संग व्यापार करे के अधिकार हे। मुख्यमंत्री आज राजधानी रायपुर के दीनदयाल उपाध्याय ऑडिटोरियम म होवत छत्तीसगढ़ चेंबर ऑफ कॉमर्स एंड इंडस्ट्रीज के 60 वां वार्षिक सम्मेलन ल मुख्य अतिथि के ठउर ले करत रिहिन हे।
मुख्यमंत्री ह कहिन कि राज्य सरकार ह पहिली काम किसान मन के थैली म पैसा डारे के करिन। किसान मन के कर्जा माफी करे गइस। धान 2500 रूपिया प्रति कोंटल के दर म खरीदे गिस। किसान मन तीर पैसा आए ले प्रदेश म व्यापार-व्यवसाय घला अच्छा चलत हावय। छत्तीसगढ़ देश के अइसनहा राज्य हरे जिहां ऑटोमोबाईल सेक्टर के वृद्धि दर सबले जादा हावय। इहां मोटरसाईकिल, हॉरवेसटर, ट्रेक्टर के सर्वाधिक बिक्री होवत हावय। माह जनवरी ले लेके अब तक देश के अउ आने राज्य मन म ऑटोमोबाईल सेक्टर के वृद्धि दर म कमी आए हवय। छत्तीसगढ़ म ऑटोमोबाईल क्षेत्र के वृद्धि दर सर्वाधिक 36 प्रतिशत हावय।
कार्यक्रम म गृहमंत्री श्री ताम्रध्वज साहू, नगरीय विकास मंत्री डॉ. शिव कुमार डहरिया, विधायक सर्वश्री कुलदीप जुनेजा अउ बृजमोहन अग्रवाल, नवा नेवरिया चुनाए लोकसभा सांसद श्री सुनील सोनी, नगर निगम रायपुर के महापौर श्री प्रमोद दुबे, पूर्व विधायक श्रीचंद सुन्दरानी, पूर्व महापौर श्रीमती किरणमयी नायक विशेष पहुना के रूप म उपस्थित रिहिने। मुख्यमंत्री ह ये अवसर म चेम्बर के काम-बूता अउ विकास म योगदान देवइया 29 सदस्य अउ पदाधिकारी मन ल चेम्बर डाहर ले सम्मानित करिन।
मुख्यमंत्री मन कहिन कि प्रदेश म लघु वनोपज अउ कृषि आधारित उद्योग मन के व्यापक सम्भावना हावय। उन मन चेम्बर के सदस्य मन ले लघु वनोंपज अउ कृषि ले जुड़े उद्योग लगाए के आव्हान करत कहिन कि उद्योग लगे ले रोजगार के अवसर बाढही ़अउ व्यापार घलो बाढे लगही। उन मन बताइन कि कोण्डागांव म मक्का प्रसंस्करण इकाई लगाये जावत हे। इही तरह चाँउर उपर अधारित उद्योग घलो लगाएं जाना चाही।
उंन मन कहिन कि प्रदेश म चलत निर्माण काम मन बन पर्याप्त धनराशि उपलब्ध करायी जावत हे। उन मन कहिन कि कन्या विवाह योजना के अंतर्गत देवइया 15 हजार रूपए के राशि बढ़ाके 25 हजार रूपिया कर दिये गे हावय। पहिली ये योजना के संचालन महिला अउ बाल विकास विभाग अउ श्रम विभाग डाहर ले करे जावत रिहिसे। तेकर सेति बहुत अकन हितग्राही दूनों विभाग ले ये योजना के लाभ लेवत रिहिने। येला थाम्हे बर कन्या विवाह योजना के संचालन महिला अउ बाल विकास विभाग डाहर ले करे जाही। कार्यक्रम म गृहमंत्री श्री ताम्रध्वज साहू, नगरीय विकास मंत्री डॉ. शिव कुमार डहरिया, विधायक बृजमोहन अग्रवाल, नवा नेवरिया सांसद श्री सुनील सोनी, नगर निगम रायपुर के महापौर श्री प्रमोद दुबे अउ पूर्व विधायक श्रीचंद सुन्दरानी मन घलो सम्बोधित करिन।
छत्तीसगढ़ चेंबर ऑफ कॉमर्स एंड इंडस्ट्रीज के अध्यक्ष श्री जितेंद्र बरलोटा के संगे संग चेम्बर ह स्वागत भाषण दीन। ये बेरा म चेम्बर के श्री पूरनलाल अग्रवाल अउ श्री खूबचंद पारख के संगे संग महामंत्री श्री लालचंद गुलवानी अउ कोषाध्यक्ष श्री प्रकाश अग्रवाल संग बहुत झिन पदाधिकारी अउ सदस्य मन ये अवसर म उपस्थित रिहिन हे।
चटकारा
घोंडुल:- वाहा दे ! हमला पीपी चुचरे बर दे दे हावय अउ अपन मन रसगुल्ला दबावत हे।
च्इता:- अरे ! जतका बड़ तोर मुँह म समाही ओतका बड़ तोर खउवा अउ जतका ओकर मुँह म आइस ओतका बड़ ओकर बर खउवा। एमा भुलियारे वाले का बात हे बेटा, हम तो तोरो आन, ओकरो आन।