खेल ले युवा मन म साहस, शक्ति अऊ दृढ़ संकल्प के विकास होथे: मुख्यमंत्री श्री विष्णु देव साय

मुख्यमंत्री श्री साय वाको भारत राष्ट्रीय किक बॉक्सिंग चैम्पियनशिप 2025 के समापन अऊ पुरस्कार वितरण समारोह म होइन सामिल
रायपुर, मुख्यमंत्री श्री विष्णु देव साय काली संझा राजधानी रायपुर के सरदार बलबीर सिंह जुनेजा इंडोर स्टेडियम म आयोजित वाको इंडिया राष्ट्रीय किक बॉक्सिंग चैम्पियनशिप 2025 के समापन अऊ पुरस्कार वितरण समारोह म सामिल होइन।
मुख्यमंत्री श्री साय ह ए बेरा म देश के 28 राज्य मन ले आए लगभग 1200 प्रतिभागी अऊ 300 कोच मन के भगवान श्रीराम के ननिहाल अऊ माता कौशल्या के पावन धरती छत्तीसगढ़ म हार्दिक स्वागत अऊ अभिनंदन करत कहिन के ए राज्य के सौभाग्य हे के वाको इंडिया राष्ट्रीय किक बॉक्सिंग फेडरेशन ह ए प्रतिष्ठित आयोजन बर छत्तीसगढ़ ल चुनिस।
मुख्यमंत्री ह प्रतिभागी मन ल छत्तीसगढ़ राज्य के विशेषता के बारे म बताइन के ए ह देश के हिरदे म स्थित एक छोट कन लेकिन अड़बड़ बड़हर प्रदेश हे, जेखर 44 प्रतिशत भूभाग म सुग्‍घर जंगल हे। इहां 5,000 वर्ग किलोमीटर म फइले सघन अबूझमाड़ क्षेत्र हे, जिहां सूरूज के अंजोर तक नई पहुंचत हे। राज्य म मनोरम जलप्रपात, सुंदर गुफा, समृद्ध खनिज संपदा अऊ सांस्कृतिक विविधता हे। मुख्यमंत्री श्री साय ह कहिन के केंद्रीय गृहमंत्री श्री अमित शाह के संकल्प के मुताबिक छत्तीसगढ़ म नक्सलवाद अब अपन अंतिम चरण म हे। मुख्यमंत्री श्री साय ह कहिन के किकबॉक्सिंग जइसे खेल युवा मन म साहस, शक्ति अऊ दृढ़ संकल्प के विकास करथे। उमन कहिन के ए आयोजन ह निश्चित रूप ले छत्तीसगढ़ ल राष्ट्रीय खेल मानचित्र म अऊ सशक्त स्थान दिही। मुख्यमंत्री ह ए भव्य आयोजन बर किक बॉक्सिंग एसोसिएशन ऑफ छत्तीसगढ़ ल साधुवाद दीन अऊ कहिन के खेल जीवन के अभिन्न अंग हे, जेन न केवल शारीरिक स्वास्थ्य बल्कि अनुशासन, आत्मविश्वास अऊ समर्पण के पाठ घलो सिखोथे।
मुख्यमंत्री ह कहिन के जीत अउ हार जीवन के हिस्सा ये, लेकिन वास्तविक लक्ष्य अपन क्षमता ल पहचानना अऊ ओला निखारना होना चाही। मुख्यमंत्री श्री साय ह प्रधानमंत्री श्री नरेन्द्र मोदी के अगुवइ म संचालित खेलो इंडिया कार्यक्रम के सराहना करत कहिन के छत्तीसगढ़ के सबो 33 जिला मन ल ए योजना ले जोड़े गे हे, ताकि शहरी अउ ग्रामीण दुनों क्षेत्र के खिलाड़ी मन ल समान अवसर मिल सकय। उमन कहिन के राज्य सरकार खेल मन ल बढ़ावा देहे बर बुनियादी ढांचा विकास, प्रशिक्षण अउ प्रोत्साहन योजना मन म विशेष ध्यान देवत हे। उमन कहिन के ओलंपिक जइसे अंतरराष्ट्रीय आयोजन म पदक जीतइया खिलाड़ी मन ल 1 ले 3 करोड़ रूपिया तक के पुरस्कार राशि देहे के योजना सरकार के प्रतिबद्धता के परिचायक हे।
मुख्यमंत्री ह छत्तीसगढ़ खेल प्रोत्साहन योजना के उल्लेख करत कहिन के ए योजना के तहत खेल मैदान के उन्नयन, उच्च स्तरीय उपकरण के व्यवस्था, खेल क्लब ल आर्थिक सहायता अऊ पारंपरिक खेल के आयोजन सुनिश्चित करे गए हे।
कार्यक्रम के समापन म मुख्यमंत्री हर जम्मो प्रतिभागी मन ल प्रतियोगिता म भागीदारी बर शुभकामना दीन अऊ आशा व्यक्त करिन के छत्तीसगढ़ अवइया बछर म देश म खेल के क्षेत्र म अग्रणी भूमिका निभाही।
कार्यक्रम ल संबोधित करत सांसद श्री बृजमोहन अग्रवाल ह कहिन के किकबॉक्सिंग जइसे खेल विशेष रूप ले बालिका मन के आत्मरक्षा बर बहुत जरूरी हे। उमन हर स्कूली छात्र-छात्रा मन ले पढ़ाई के संग-संग खेल ल अपन दिनचर्या म सामिल करे के अपील करिन। उमन कहिन के स्वस्थ शरीर म ही स्वस्थ मस्तिष्क निवास करथे अऊ मुख्यमंत्री श्री विष्णु देव साय के नेतृत्व म राज्य म खेल ल हर स्तर म प्रोत्साहन मिलत हे। उमन कहिन के प्रदेश म खेल अकादमी अऊ आधारभूत ढांचा के घलो तेजी ले निर्माण करे जात हे।
महापौर श्रीमती मीनल चौबे ह घलोक कार्यक्रम ल संबोधित करत जम्मो खिलाड़ी मन के उत्साहवर्धन करिन अऊ उमन ल उज्जवल भविष्य के कामना करिन। ए अवसर म वाको इंडिया राष्ट्रीय किक बॉक्सिंग फेडरेशन के अध्यक्ष श्री संतोष अग्रवाल, छत्तीसगढ़ किक बॉक्सिंग एसोसिएशन के अध्यक्ष श्री छगन मुंदड़ा, छत्तीसगढ़ राज्य अल्पसंख्यक आयोग के अध्यक्ष श्री अमरजीत छाबड़ा, ऑब्जर्वर श्रीमती रेणु पारीख, श्री मुरली शर्मा, स्थानीय जनप्रतिनिधि अउ खेलप्रेमीजन उपस्थित रहिन।
ए प्रतियोगिता म 22 स्वर्ण, 18 रजत अउ 26 कांस्य पदक के संग पंजाब ह प्रथम स्थान प्राप्त करिस। 21 स्वर्ण, 16 रजत अउ 29 कांस्य पदक के संग महाराष्ट्र दूसर अउ 12 स्वर्ण, 14 रजत अउ 15 कांस्य पदक के संग तमिलनाडु तीसर स्थान म रहिस। ए चैंपियनशिप म छत्तीसगढ़ ह 8 स्वर्ण, 13 रजत अउ 37 कांस्य पदक के संग राष्ट्रीय स्तर म छठवां स्थान हासिल करिस, जऊन राज्य बर गौरव के बात हे।