चालू रबी सीजन म 57,078 हेक्टेयर म सिंचाई के लक्ष्य पूरा होवईया हे
रायपुर, 28 अप्रैल 2020। मुख्यमंत्री श्री भूपेश बघेल जउन चाहत रहिन ते मुताबिक राज्य म रबी फसल के सिंचाई बर जल संसाधन विभाग के जलाशय, बांध अउ बैराज मन ले पानी छोड़े जात हे। ये रबी सीजन म 57 हजार 78 हेक्टेयर क्षेत्र म सिंचाई बर जलापूर्ति के लक्ष्य पूरा होवईया हे।
जानबा होए हे के मई के पहिली हफ्ता तक रबी फसल के सिंचाई बर निरधारित लक्ष्य ल पूरा हो जाही। रबी फसल के सिंचाई के ये लक्ष्य बीते साल के तुलना म दुगुना ले जादा हे। पउर साल रबी सीजन म 28 हजार हेक्टेयर म जलापूर्ति होए रहिस।
जल संसाधन मंत्री श्री रविन्द्र चौबे के बताती राज्य म रबी के सिंचाई के क्षमता म दुगुना बढ़ोत्तरी के मुख्य कारण ये हे के बीते एक साल म जल संसाधन विभाग ह सिंचाई के जुन्ना योजना मन के जीर्णोंद्धार अउ उन्नयन करके उंखर सिंचाई क्षमता ल फेर सुधारे हे, जेखर से राज्य म रबी के सिंचाई क्षमता 28 हजार हेक्टेयर ले बाढ़के 75 हजार हेक्टेयर हो गए हे अऊ एकर लाभ राज्य के किसान मन ल मिले लगे हे।
जल संसाधन विभाग ले मिले जानकारी के मुताबिक ये साल राज्य के 18 जिला मन म रबी फसल के 57 हजार 78 हेक्टेयर क्षेत्र म किसान के मांग के मुताबिक समय-समय म सिंचाई बर पानी देहे जात हे। बालोद जिला म 9104 हेक्टेयर, दुर्ग म 397 हेक्टेयर, राजनांदगांव म 1651 हेक्टेयर, महासमुंद म 1196 हेक्टेयर, रायपुर म 2050 हेक्टेयर, धमतरी म 11 हजार 166 हेक्टेयर, बिलासपुर म 1191 हेक्टेयर, कोरबा म 83 हेक्टेयर, रायगढ़ म 1322 हेक्टेयर, जांजगीर-चांपा म 11 हजार हेक्टेयर, सरगुजा म 5551 हेक्टेयर, बलरामपुर-रामानुजगंज म 889 हेक्टेयर, सूरजपुर जिला म 1765 हेक्टेयर, कोरिया जिला म 4983 हेक्टेयर, जशपुर म 1110 हेक्टेयर, बलौदाबाजार-भाटापार म 1600 हेक्टेयर, बस्तर म 600 हेक्टेयर अऊ कांकेर जिला म 700 हेक्टेयर क्षेत्र म रबी फसल के सिंचाई बर जलापूर्ति करे जात हे।
