छत्तीसगढ़ के रजत जयंती म रहिही सुनहरा मौसम, स्वागत बर तियार राजधानी रायपुर

रायपुर, छत्तीसगढ़ के रजत जयंती 1 नवम्बर 2025 के दिन मौसम के लिहाज ले घलोक खास रहिही। मौसम विभाग के मुताबिक राज्यभर म आसमान साफ अऊ घाम निकले रहे के संभावना हे। हल्का जूड़ गरेर के संग दिन के तापमान 30 ले 32 डिग्री सेल्सियस अऊ रात के कम तापमान 18 ले 20 डिग्री सेल्सियस के बीच रहे के अनुमान हे। राजधानी रायपुर म बिहनया-बिहनया हल्का जाड़ अऊ संझा सुहावना माहौल मनखे मन ल रजत जयंती उत्सव के पूरा आनंद देही।
उत्तर छत्तीसगढ़ के अंबिकापुर, कोरिया अऊ सरगुजा म हल्का धुंधरा छा सकत हे, जबकि बस्तर अऊ दंतेवाड़ा के जंगल मन म भिनसरहा के नमी अऊ ठंडा हवा के एहसास रहिही। मौसम विभाग ह बताइस के पूरा प्रदेश म पानी गिरे के कोनो संभावना नइ हे।
रायपुर म प्रधानमंत्री श्री नरेंद्र मोदी के आगमन ल देखत प्रशासन अऊ सुरक्षा एजेंसी मन ह तियारियां पूरा कर लेहे हे। नवा विधानसभा भवन अऊ शहीद वीर नारायण सिंह स्मारक संग्रहालय के लोकार्पण जइसे ऐतिहासिक अवसर म मौसम घलोक मानो उत्सव म सामिल होए ल तियार हे।