सूरजपुर, 12 सितंबर 2024। महिला अउ बाल विकास अउ समाज कल्याण मंत्री श्रीमती लक्ष्मी राजवाड़े ह सूरजपुर जिला के आंगनबाड़ी केंद्र बीरपुर ले आज वजन तिहार 2024 के शुभारंभ करिन। महिला अउ बाल विकास परियोजना सिलफिली के सेक्टर पार्वतीपुर के आंगनबाड़ी केंद्र बीरपुर ले वजन तिहार रथ ल हरी झंडी देखाके रवाना करे गीस। राष्ट्रीय पोषण महिना के तहत 12 ले 23 सितंबर तक वजन तिहार कार्यक्रम चलाए जात हे, जेकर शुरूआत आज ले राज्य के हर एक आंगनबाड़ी केंद्र म होइस।
सूरजपुर जिला के बीरपुर आंगनबाड़ी केंद्र म वजन तिहार कार्यक्रम के शुभारंभ के अवसर म मंत्री श्रीमती राजवाड़े ह कहिन कि माता मन ल लइका मन के स्वास्थ्य उपर विशेष तौर ले ध्यान देना चाही। ओ मन ल संतुलित अउ पौष्टिक आहार के सेवन करावंय, ताकि लइका मन के स्वास्थ्य अच्छा अउ वजन संतुलित रहय। ए बेरा म मंत्री श्रीमती राजवाड़े ह ’एक पेड़ मां के नाम’ अभियान के तहत वृक्षारोपण घलोक करिन। उमन राष्ट्रीय पोषण महिना 2024 के गतिविधि मन के जानकारी घलोक लीन। उमन स्कूल के नोनी मन के एनीमिया जांच के जानकारी लीन अऊ खुद के स्वास्थ्य जांच घलोक कराइन।
जानबा हे कि राष्ट्रीय पोषण महिना के तहत आज राज्य म वजन तिहार कार्यक्रम के शुभारंभ करे गीस। ए कार्यक्रम के आयोजन 12 ले 23 सितंबर 2024 तक होही, जेमां शून्य ले 06 साल ले कम के लइका मन के वजन अउ ऊंचाई जांच करके कम वजन वाले लइका मन के चिन्हारी करके कुपोषण के स्थिति के पता लगाए जाही। ए बेरा म ऊंखर कुपोषण के स्तर के घलोक जांच करे जाही। वजन तिहार के उद्देश्य 6 साल ले कम आयु के लइका मन के पोषण स्तर के आंकलन करके शत्-प्रतिशत रूप म सुपोषित करना हे।
